Hagit sa mayor

Kining gihimo sa warden sa Quezon City Jail nga si Superintendent Maria Lourdes Pacion, nga gitugotan niya nga si kanhi House Speaker Martin Romualdez makadala og iyang staff nga mokuyog niya sa prisohan, dili gyud ni maayo.

Mangutana mo og nganong dili maayo? Kon pananglitan ang ubang piniriso nga maka-afford sab pagdala og ilang “katabang” sulod sa prisohan ug mohangyo sab, law-ay kaayo nga iyang balibaran. Kon iya kini nga balibaran, dili kaha makiha na siya og graft?

Magtuo na man ang uban nga gibayran si Pacion og dakong kantidad mao nga wa kini makabalibad sa hangyo ni Martin. Nasayod baya kita sa pasangil nga si Martin kuno nakadawat og hilabihan kadaghang minaleta nga kuwarta gikan sa kickback sa flood control project.

Para nako, angay gyud unta nga magmatngon si Pacion sa iyang pagahimoon nga hukom. Ang pagpakuyog sa usa ka piniriso og “staff” or helper niya sulod sa prisohan, wa gyud na gilatid sa Jail Manual.

Busa mentras karon pa, angay’ng hinuktokan ni Pacion kon unsay angay niyang himoon kay basin og dunay makahukom nga mopasaka niya’g kaso kabahin niini.

Si Martin gipriso tungod sa giatubang niyang kasong plunder kay gipasanginlan siyang apil sa nakadawat og binilyon ka pesos nga kickpack gikan sa flood control project.

* * *

Nindot baya ang gihimo ni Cebu City Mayor Nestor Archival nga pagmugna og task force nga moatiman kuno sa paghawan sa “three-meter easement” gikan sa tampi sa kasapaan dinhi sa siyudad.

Matud sa mayor nga base gud kuno sa Article 51 sa Water Code of the Philippines (Presidential Decree No. 1067), ang tulo ka metros gikan sa tampi sa kasapaan, maisip ni nga gitagana sa public use.

Pero siyaro pud, nganong karon ra man kini mahunahunai sa mayor? Wa ba siya masayod nga ang problema sa paglunop ug pagbaha apil sa tulo ka nag-unang problema sa siyudad?

Ang laing mga nag-unang problema ang kabahin sa traffic ug ang maayong paghipos sa basura. Kini kunong task force nga iyang pagamugnaon, langkoban sa mga sakop sa lainlaing departamento sa City Hall.

Nakaingon ko nga kon molampos si Mayor Archival niini, himoon nako kini nga “sangod” kun amulet, anting-anting. Pero makita nato kon matinud-anon ba gyud si Mayor Archival kon mapaguba niya ang kabahin sa dakong tindahan nga nagbabag sa tubig sa Estero de Parian, ug maoy makamugna og lunop diha sa downtown area.

Bi, anha sugdi diha mayor kay ang The Freeman baya, dugay na nga miguba sa iyang kural nga nasulod sa three-meter easement. Tan-awon nako kon makasukol ka ba sa kagamhanan sa tag-iya sa tindahan, nga suod ra ba na sa dako sab nga opisyal sa siyudad.