EDITORYAL — AI hulga sa BPO

Nagkadaghan na nga mga Pilipino ang naa sa industriya sa Business Process Outsourcing tungod sa local ug international companies nga nakauyon sa serbisyo ug kalidad sa trabaho nga kaya nilang buhaton.

Ug labaw sa tanan mas makamenus sila sa gastos komparar sa ubang mga nasud nga nag-offer pud og BPO.

Apan hangtud kanus-a kaha ni magpadayun? Hangtud pila ka tuig ang lahutay nga ang industriya magkinahanglan og buhi ug aktwal nga tawo nga moatiman sa panginahanglan sa mga kompanya?

Sama sa pagbutho sa cellphones, dili na mapugngan ang paglambo sa artificial intelligence nga paspas kaayong nagamit ang aplikasyon sa halos tanang kalihokan sa mga tawo.

Dili pa perpekto para sa tanan ang AI, apan padung na kining tanan sa maong direksyon. Daghang mga problema nga nasulbad gamit ang AI, gikan sa pag-analisar sa problema hangtud sa proseso sa solusyon ug tubag niini.

Mas gipasayon sa AI bisan ang pinakalisod nga mga problema ug pangutana nga nakatabang na karon sa tawo, gani nalabwan pa niini ang ubang mga tawong henyo.

Sumala pa sa I.T and Business Process Association of the Philippines (IBPAP) nakatampo og P32.5 bilyones ang BPO sa ekonomiya sa nasud atong tuig 2022.

Aron mamentinar kini dinhi bisan naa nay AI, kinahanglang tabangan sa gobiyerno ang maong sektor pag-upskilling aron sila mahanas pud sa paggamit og AI.

Katong wala na nanarbaho sa BPO, nisulod na og freelancing ug outsourcing sama anang virtual assistant apan sa gihapon kakompetinsya nila ang AI.