Bounce back win ng Bulldogs kontra Falcons

MANILA, Philippines — Bumawi kaagad ang Na­­tional University mula sa kanilang nakaraang ta­lo ma­tapos lapain ang Adam­son University, 85-66, sa UAAP Season 89 men’s bas­­ketball tournament ka­ha­­pon sa SM Mall of Asia Arena sa Pasay City.

 Mainit na sinimulan ng Bulldogs ang laro at pi­nigilan nila ang lahat ng tangkang paghabol ng Falcons para irehistro ang 3-2 karta at manatili sa top four sa team standings.

Pero para kay NU head coach Jeff Napa, hindi pa siya kuntento sa ipinakitang laro ng kanyang mga bataan.

“It’s a good response co­ming from a loss to Ate­neo pero medyo subpar pa rin ‘yung performance kasi nga we gave 13 three points sa Adamson. We need to address that para coming to Saturday’s game, ma-cor­rect namin ang mga sa­rili namin,” sabi ni Napa.

Humarurot ang Bulldogs ng 29-4 run kung saan umiskor si PJ Palacielo ng 10 points sa kalagitnaan ng kanilang ratsada upang makaipon ng malaking ben­tahe sa first quarter.

Nagpatuloy ang pana­na­lasa ng NU para ita­rak ang 50-35 halftime lead.

Nagpakita ng lakas ang Falcons at naibaba ang ka­lamangan sa anim na puntos sa third quarter matapos ang magkasunod na buslo ni Kenji Cañete na nagdala sa iskor sa 58-52.

Ngunit nanatiling buo ang loob ng Bulldogs at muling nakalayo sa 52-64 papasok ng fourth period.

Sa payoff period ay hin­di na nakadikit ang Adam­son na laglag sa pangalawang talo.