Gipangita pang palusot

Unsaon pagsagang ni Bise Presidente Sara Duterte ang pasangil nga kalapasan sa 1987 Constitution ang padayon nga pagpanag-iya sa mga kompaniya nga gilista sa iyang Statements of Assets, Liabilities, and Net worth (SALNs)? Duha ka posibleng depensa ang gipalutaw sa iyang kampo:

•Una, wala did-i sa Konstitusyon ang pagpanag-iya kon dili ang pag-apil sa negosyo ug ang pagpanag-iya sa mga kompaniya dili pruyba sa pag-apil sa negosyo; ug

•Ikaduha, bisan sakop siya sa board sa pipila ka kompaniya, walay ebidensiya nga apil siya sa aktuwal nga operasyon sa mga kompaniya.

Kinadak-ang buslot sa depensa: Ang pagpanag-iya sa mga kompaniya mao ang labing batakan ug importante nga paagi sa pag-apil sa mga negosyo. Isip tag-iya o usa sa mga tag-iya sa gilista niya nga mga kompaniya, si VP Sara dunay bahin sa tanang ginansiya ug alkanse.

Gawas pa, ang tuyo sa pagdili sa Konstitusyon mao ang paglikay presidente, bise presidente ug mga sakop sa Gabinete --ang labing tag-as nga mga opisyal sa gobyerno-- nga mopabor sa pribadong mga negosyo ang dagko nilang gahom sa pagpatuman sa mga balaod ug pagpanimon sa nasud.

Ang desperado nga pagpaburot sa depensa sa kapakyas sa Konstitusyon sa pagdili sa presidente ug bise presidente ug mga sakop sa Gabinete sa pagpanag-iya og mga negosyo mohiyos sa mas klaro nga mga probisyon sa Anti-Graft and Corrupt Practices Act ug Code of Conduct and Ethical Standards for Public Officials and Employees: Nga nagdili sa conflict of interest ug nagsugo sa pag-divest sa pribadong mga negosyo.

Mas maayong mangita na si VP Sara og mas katuohang palusot.

Nga wala pa nila matultoli kon basehan ang sulti sa iyang abogado sa ika-28 nga adlaw sa impeachment trial gahapon. Dihang gipangutana unsa ang tinuod nga papel ni VP Sara sa mga kompaniya nga gilista sa iyang SALN pero wala maglista niya sa mga dokumento sa Securities and Exchange Commission, igo lang niingon nga unya na sila motubag sa tukmang panahon.

Makapahinumdom sa katawhan sa saad ni VP Sara nga tubagon ang tanang pasangil sa tukmang forum. Pero gi-isnab niyang husay. Kon dili sa Senate impeachment court, asa man? Kon dili karon, kanus-a pa man?