Mura'g discount sa Temu

Dili na motahan sa iyang boto si Senator-Judge Francis Escudero ini'g desider unya sa mga senator-judges kon sustenihan ba o dili ang 16 ka boto nga threshold aron pagkonbikto ni Bise Presidente Sara Duterte.  Barogan ni Escudero ang iya’ng nahaunang desisyon nga 2/3 sa 24 ka senador o 16 ang gikinahanglan nga boto.  Dili man problema kon pila ang kinahanglan kay sobra pa man sila karon sa 16 apan kay politikanhong kalihokan man lage ang impeachment mao nga dili unya basehan ang ebidensya. Matud pa sa mga netizens, “Mora na man og gitratar sa mga senador ang 2/3 threshold nga rebate o discount sa Temu inay usa ka strikto nga constitutional rule.” Madahaan!

Kwarta ang mamulong

Matud pa ni Dr. Rosalio Torres, ang overall coordinator sa Cardinal Santos Medical Center, dakong risgo alang sa kanhi Speaker Martin Romualdez kon ibalhin siya sa laing hospital.    Unsa ba guy risgo nga sa obserbasyon gani sa ubang doktor wala ma’y sakit si Romualdez kon basehan ang iyang mga vital signs?  Sayon ra gyud kaayo tuison ang kamatooran kon kwartahan ang hingtungdan. Mao kana’y giingon nga, “Kon kwarta na gani ang mamulong, ang tanan maminaw ug mopatalinghug gayod.” Muleeng!

Katuohan-dili

Sa iyang pakigpulong atol sa paghandum sa ika-109 nga kasumaran sa adlaw’ng natawhan sa iyang amahan, namahayag si Presidente Ferdinand Marcos, Jr., nga nahinumduman niya ang gitudlo sa iyang amahan sa kamahinungdanon sa pag-alagad sa katawhan inay pagbugtaw sa politikanhong gahum ug taas nga posisyon, ingon man ang pagbuhat sa husto, bisan pa man kon malisod kini.  Mao diay nga naningkamot si Marcos, Jr. nga mapresidente, bisan dili man kaha mahinungdanon ang politikanhong gahum ug taas nga posisyon.  Ni’ngpamahayag sa presidente, mi-komento ang palahubog sa among lugar sa pag-ingon nga, “Asa ko ‘tu-o.” Ateerr!

Dili motingog kay bungol

giawhag ni bise presidente sara duterte si Presidente Ferdinand Marcos, Jr.  sa pag-resign sa iyang katungdanan kay alng kaniya, si Presidente Marcos, Jr., mao ang suliran sa atong nasud kinsa wala kuno motan-aw og utang kabubot-on sa katawhan nga maoy nagbutang kaniya sa iyang pwesto.  Makaseguro kita nga kini’ng panawagan dili panumbalingon sa Malacañang. Makapahinumdum kining panawagan ni Duterte sa awit sa elementary school kaniadto nga nagkanayon, “Ang Maya wala’y kaulaw…sangpiton dili motingog, dli motingog kay bungol man.”   Fezteleern!

Humot og ilok, baho’g kinaiya

Gipasabot ni Liloan, Mayor Aljew Frasco nga ang nag-unang katuyoan sa ipatuman unya nga “Pay As You Throw” system sa pag-atiman sa basura mao ang pag-usab sa kina-iya sa mga residente sa ilang pagdumala sa kaugalingon’g basura ug dili kay gitumong lamang sa pagpangolekta og bayad.  Angayan gayod nga disiplinahon ang katawhan sa ilang pagpataka'g labay sa basura kay nakahatag kini’g daghang suliran. Kay matud pa bitaw, “Humot lage ka’g ilok pero baho kaayo ang imong pagtratar sa kalikopan kay magpasagad ka man lang og salibay sa imong basura.” Pagkatoytoy!