Sekreto nga mabisto
Ini'g bagting sa alas-9 sa buntag karong Huwebes, Hulyo 30, mapupos ang lugway sa Senate impeachment court sa pagsumiter sa gisupina nga 20 ka tuig nga financial records ni Bise Presidente Sara Duterte ug sa iyang bana ug sa ilang mga kompaniya ug law office:
• Bank records sa siyam ka branches sa ilang mga bangko sa Metro Manila ug Davao City;Bank transactions nga gi-report sa ilang mga bangko ngadto sa Anti-Money Laundering Council (AMLC); ugIlang income tax returns (ITRs) sa Bureau of Internal Revenue (BIR).
* * *
Gawas sa AMLC records nga susihon pa ni Presiding Officer Chiz Escudero kon dili ba mabisto ang confidential nga mga taktika sa ahensiya ug sa ITRs nga mahimong ipananghid pa sa Malakanyang, makuha dayon sa prosekusyon ug sa depensa ang ilang kopya sa bank records.
Sa ato pa, tungod sa katabian sa House ug private prosecutors, mahimong mahibaw-an na sa dili pa matapos ang Huwebes kon tinuod ba ang dugay nang gipasangil nga binilyon ka pesos ni VP Sara nga wala ideklarar sa iyang statements of assets, liabilities and net worth (SALNs).
* * *
Sa dili pa masumiter ang financial records isip ebidensiya sa kataposang bahin sa impeachment trial (Oktubre o Nobyembre karong tuiga sa banabana sa prosekusyon), magkapuliki na ang defense lawyers sa pagpasabot unsay katuyoan, diin gikan ug diin padulong ang binilyon ka pesos nga nisulod-gawas sa bank accounts ni VP Sara nga gi-report na sa AMLC ngadto sa House Justice Committee niadtong Abril karong tuiga.
Mahibaw-an na gyod kon legal o ilegal bang mga tinubdan ug mga destinasyon sa nagbaha nga kuwarta.
* * *
Suweldo ni VP Sara ang kinadak-ang tinubdan sa iyang kuwarta. Mga dokumento sa Securities and Exchange Commission nagbutyag nga gamay rang ginansiya sa pipila ug alkanse pa gani ang uban nilang mga negosyo ug walay kita ang ilang law office.
Sukad sa 2007 (kanus-a nideklarar og net worth nga P7.2 milyones) dihang na-bise mayor sa Davao City, hangtod 2025, iyang suweldo (walay iban sa gasto) niabot og P30 milyones. Maglisod na siyang daan pagpasabot nganong niabot og P88.5 milyones ang iyang net worth sa 2025. Unsa pa kaha sa gitago nga bilyones?
* * *
- Latest
