EDITORYAL — Mga Pilipinong traydor

Karung adlawa ang ikalimang state of the nation address ni Presidente Ferdinand Marcos Jr., daghan ang gapaabot sa iyang ipamulong.

Sa miaging semana, nigawas sa survey nga gusto sa kadaghananan sa mga tawo nga hisgutan sa presidente ang kurapsyon, kung unsa na ang gibuhat batok sa mga kurakot.

Walay Pilipino nga dili gustong madungog ang gibuhat sa gobiyerno batok sa kurapsyon bisan pa man naay mga tawo ang wala nay salig sa mga gipang estorya ni Marcos.

Masabtan ra ning uban nga di motuo sa presidente, apan mas daghan ang gustong madungog kung unsay gibuhat sa administrasyon.

Gawas sa kurapsyon, kinahanglang hisgutan sa presidente kun unsay gibuhat batok aning mga Filipino nga nagluib o nagtraydor sa nasud.

Sa init nga tensyon karun sa West Philippines Sea, naay pipila ka impluwensyadong mga personalidad sa social media ang nangusog karon sa pagpatigbabaw sa naratibo nga pabor sa China. Kaning mga vloggers kun ang naratibo maghisgut na gani nga pabor sa interes sa China, dapat isipon dayun nga mga traydor sila kay walay rason para di ipagtibabaw ang interes sa nasud kun itapad sa China.

Bisan unsa pang pagbuwak-buwak nga mga content, kun kontra Filipino, dili na kana matawag nga binuhatan sa tawong may pagmahal sa nasud.

Mas labing maayo gani pangitaon ni sila og pangkasohan, kung dili na maisip nga kagawasan sa pagpadayag ang ilang mga gipang post sa social media.

Ang kagawasan sa pagpadayag maputol kun ang gipadayag makadaut na sa uban ug magbutang sa nasudnong seguridad sa peligro ug mangagni na sa uban nga ang sangputanan kaalaotan na sa nasud.