Feeling manluluwas

Ambot kinsay nagkumbinser sa managsuong Pia ug Alan Peter Cayetano nga sila ang tigbantay sa impeachment trial ni Bise Presidente Sara Duterte. Nga tungod sa ilang pagka abogada ug abogado sila ray takos nga mogiya sa husay aron nga dili masaag sa mga lagda.

Sa walay kinutoban nilang pagbarug ug pagsulti ug pagsal-ot sa bisan unsang bahin sa husay usa ray gibalikbalik nilang mensahe: Sila ray kamao ug busa makaayo sa tanang hingtungdan --ang prosekusyon, depensa, ug senator-judges-- kon paminawon sila ug tumanon ang tanan nilang mga tambag ug mga pahimatngon.

-o0o-

Angayng pahalipayan ang ilang kaubanan sa impeachment court. Labi nang taga majority bloc nga gipangulohan ni Senate President Sherwin Gatchalian. Tungod sa talagsaon nga pagpugong sa ilang kaugalingon sa pagpalit sa tanang insulto sa mga Cayetano.

Nagkasabot tingali nga samtang dili mahimong pahilumon ang managsuon kalikayan ang dugang kalangay sa husay pinaagi sa pagsakay sa ilang tulibagbag. Uban ang panghinaot nga si Presiding Officer Chiz Escudero makakita og makiangayong mga paagi sa pag-apura sa ni-ungot nga presentasyon sa mga ebidensiya ug mga testimoniya batok ug pabor ni VP Sara.

-o0o-

Kay wala may nibaraw nila, nakapatuyang ang mga Cayetano sa pagpataka. Sama sa ilang pangugat sa unang adlaw sa husay nga gisugo sa 1987 Constitution nga presidente sa Senado, si Gatchalian, ug dili si bisan kinsa, sama ni Escudero, ang maka-preside sa impeachment trial ni VP Sara.

Silang Alan ug Pia wala magtagad pagbakwi sa ilang binuang bisan nipasabot si kanhi constitutional commissioner Christian Monsod nga dunay gahom si Gatchalian pagpili og laing presiding officer.

-o0o-

Lain nilang pataka niadtong Miyerkules: Pagpanghulga ang pahibawo ni National Bureau of Investigation Director Melvin Matibag nga imbestigasyon sa binilyon ka pesos nga balor sa mga transaksiyon sa pag-host sa Pilipinas sa Southeast Asian Games niadtong 2019.

Ilang rason? Si Matibag saksi sa impeachment trial ug maapil sa imbestigasyon si Alan nga huwes sa husay. Sa kataas sa ilang yawyaw wala kahisgot ang mga Cayetano og bisan usa ka balaod nga nagdili ni Matibag paghimo sa iyang trabaho kay mo-testify sa impeachment court sunod semana ug nagdupa ni Alan gikan sa imbestigasyon tungod lang kay senator-judge siya.