Ika-3 dikit hinataw ng SJI-Bacolod
MANILA, Philippines — Nagtulungan sa opensa sina Caera Celis at Edz Escultura upang akbayan ang St. John’s Institute-Bacolod sa panalo kontra guest team Perfect Set Dream Makers, 25-16, 25-15 sa 2026 Shakey’s Juniors National Invitationals na nilaro sa Playtime FilOil Arena sa San Juan, kahapon.
Malinis sa tatlong panalo ang Falcons kaya naman lumalapit sila sa pagsilo ng isang spot para sa Final Four sa tournament na suportado ng Shakey’s Pizza Parlor, Peri-Peri Charcoal Chicken, Potato Corner, at R and B Milk Tea.
Tumikada si Celis ng 11 points mula sa pitong kills at apat na service aces habang bumakas si Escultura ng nine markers kasama ang five attacks at four service aces para pamunuan ang puntusan ng SJI-Bacolod
“It feels good to play against other teams from other countries. Siyempre taga-ibang bansa sila kaya naga-adjust kami kasi iba ang sistema nila,” pahayag ni Escultura matapos nilang pabagsakin sa loob lamang ng 52 minuto ang California-based Dream Makers. “We’re grateful na nakalaban namin sila,”
Dominado ng SJI-Bacolod ang laban dahil sa 13 service aces na kabuuan ng koponan at lamang pa sila sa attacks kontra Dream Makers, 23-14.
Nalasap ng Perfect Set ang pangatlong sunod na kabiguan sa tournament na katuwang ang Jetour, Baic, Eurotel, Victory Liner Rent & Go, F2 Logistics, Summit Natural Drinking Water, PusoP.com at Smart Sports.
Tumipa si Victoria Anderson ng six attack points para sa Dream Makers habang tatlo ang kinana ni Nizmund Manalad.
Samantala, hinataw ng One La Salle ang three-game winning streak matapos pagpagin ang Pusong Azul, 25-22, 25-19, nirehistro nila ang 3-1 win-loss record.
- Latest
