Tanim-bala o aksidente?

Hugtanong gihimakak sa kadagkuan sa Mactan Cebu International Airport (MCIA) ang mga pasangil sa “tanim-bala” diha sa tugpahanan taliwa sa pagkasikop sa us aka 47-anyos nga pasaherong babaye niadtong Marso 27 sa hapon.

Ang babaye nga usa ka HR manager ug lumolopyo sa dakbayan sa Lapu-Lapu giingong nakuhaan og upat ka mga bala sulod sa iyang gibitbit nga bagahi. Kini maoy hinungdan nga gisikop siya sa kapolisan ug gipasakaan gyud og kaso.

Nunot sa maong insidente, misibaw ang mga kahingawa nga niabot na dinhi sa Sugbo ang modus sa “tanim-bala” sa mga kurakot nga mga kawani sa tugpahanan didto sa kaulohan. Way motuo nga ang usa ka 47 anyos nga babaye ug HR manager sa usa ka kompaniya magdala og bala sa iyang bagahi.

 Kay kinsa ba tinuoy boang nga magdala og butang nga illegal sa airport nga sayod man ang kadaghanan unsa ka istrikto ang seguridad sa mga tugpahanan. Busa mas daghan ang motuo nga tinanom ang maong ebidensiya.

Aron pagprobar nga way basihan ang mga pagtahap nga dunay nahitabong “tanim-bala” diha sa MCIA, gipakita sa kadagkuan sa tugpahanan ang mga video nga kuha sa ilang CCTV. Sa video makita ang paghimo sa pagsuhid sa bagahi sa dinakpan ug sa pagkadiskobre sa upat ka mga bala.

Way timailhan nga dunay mga kawani sa tugpahanan nga mituyo og butang sa mga bala didto sa bagahi. Busa ang posibilidad mao nga aksidente nga nadala sa pasahero ang upat ka mga bala nga wa siya makabantay.

Tingali leksiyon ni sa tanang mga mobiyahe nga susihon gyud og maayo ang ilang mga bagahi sa dili pa molarga aron sigurohon nga way mga kontrabando nga nasulod. Ug tingali panahon na sab nga usbon ang mga lagda mahitungod sa bala nga makit-an diha sa mga bagahi.

Inay dakpon ug prisohon ang mga masakpan nga dunay bala sa ilang bagahi, mas maayo tingali nga kumpiskahon nalang kini sama sa ubang mga gidili nga mga butang. Gawas lang og duna gyuy dautan nga intensiyon ang pasahero nga magdala niini.

Apan kun inosente ug aksidente lang ang pagkasulod sa bala sulod sa bagahi, dili sab tingali makiangayon nga bilangoon ug kasohan ang usa ka pasahero. Kun mausab ang lagda mahitungod niini, mahunong na sab ang modus sa ubang mga mapahimuslanong kawani sa mga tugpahanan.