LTO mitanyag og libreng TDC ngadto sa kababayen-an

CEBU, Philippines —  Gisaulog sa Land Transportation Office(LTO)-7 ang Women's Month pinaagi sa pagtanyag og Theoretical Driving Course(TDC) sa nagkalain-laing dapit sa rehiyon.

Samtang usa ka special roadside inspection ang gipahigayon sa pito ka LTO-7 female law enforcement officers niadtong Biyernes, Marso 28, 2025.

Ang mga female enforcement officers nagpahigayon og operasyon sa Cebu City diin 19 ka motorista ang gidakop kay nakalapas sa traffic laws, rules and regulations.

Sa 19 nga nadakpan, 13 ka motorista ang na-isyuhan og manual temporary operator's permits sa kalapasan sa Republic Act 4136 kun Land Transportation and Traffic Code), Republic Act 8750 kun Mandatory Use of Seat Belt, ug Republic Act 10666 kun Children's Safety on Motorcycles Act.

"Our female enforcement officers prove that women are equally capable of enforcing traffic laws, just like their male counterparts", sigon ni LTO-7 Regional Director Glen Galario.

Samtang dul-an sa usa ka gatus ka mga kababayen-an ang nakabenipisyo sa libreng TDC nga gitanyag sa ahensiya pinaagi sa pakig-alayon sa local government units.

Nakig-alayon ang LTO-7 sa Barangay Pooc sa Talisay City alang sa pagpahigayon sa libreng seminar niadtong Marso 11 ug 12 diin 101 ka partisipante ang nakadawat og TDC certificates, apil niini ang 20 ka kababayen-an.

mokabat usab sa 21 ka babaye nga graduates ang nakadawat og libreng TDC certificates atol sa seminar nga gipahigayon sa LTO-7 Multipurpose Hall sa Natalio Bacalso Office sa Cebu City.

Samtang sa lungsod sa Argao, 178 ang TDC graduates sa libreng seminar niadtong Marso 18 ug 19, diin 14 ang babaye nga nigradwar ug nakadawat og certificates.

Laing 12 ka babaye ang ni-avail sa libreng TDC sa Lungsod sa Garcia Hernandez, Probinsya sa Bohol diin 63 ka graduates ang ni-participate sa seminar pagka Marso 24 ug 25.

Gihimug-atan ni Regional Director Galario nga ang libreng TDC sa ahensiya magpadayon ug welcome ang mga kababayen-an nga moapil.

"We highlight the contributions of women in our society, especially during this month of March, which celebrates Women's Month. We offer our free TDC to them, hoping this will help them obtain their own driver's license", ni Regional Director Galario pa.

Ang Theoretical Driving Course usa ka 15-hour seminar o classroom session nag-focus sa fundamentals sa driving ug road safety. Usa kini ka mandatory requirement alang sa pagproseso og student-driver's permit. (BANAT NEWS)