Siyam ka rason

Nganong dili nang kagawas si kanhi Presidente Rodrigo Duterte sa prisohan sa International Criminal Court (ICC) sa The Hague:

• Legal ang pagdakop niya tungod sa arrest warrant sa ICC;

• Legal ang pagtunol niya sa ICC tungod sa sa Republic Act 9851 (International Humanitarian Law) nga nagtugot pagsurender sa dinakpan ngadto sa internationall tribunal nga naghimo sa imbestigasyon sa krimen;

• Walay mahimo ang mga petisyon nga nag-awhag sa Korte Suprema sa Pilipinas pagpabalik ni Duterte kay dili ubos sa iyang hurisdiksiyon ang The Hague ug ang ICC;

-o0o-

• Walay makapugos sa ICC sa pagpagawas ni Duterte sa prisohan, bisan pa kon mausab ang hunahuna ni Presidente Ferdinand Marcos Jr. ug iyang bawion ang kanhi presidente, o bisan pa gani kon mapalagpot si Marcos sa gahom ug si Bise Presidente Sara Duterte nay magtungkawo sa Malakanyang;

• Makuwestiyon atubangan sa ICC ang legalidad sa pagdakop ni Duterte pero sa nangaging mga desisyon mas gihatagan og importansiya sa ICC nga nadakpan ang sinumbong aron makasugod nang husay sa kaso;

-o0o-

• Makuwestiyon sa iyang mga abogado ang hurisdiksiyon sa ICC kay 2021 na gitugotan ang formal investigation, duha ka tuig human nibiya si Duterte sa ICC sa 2019 (pero 2018 pa nagsugod ang imbestigasyon sa Office of The Prosecutor nga, segun sa Rome Statute, kabahin sa ICC);

• Makagawas lang si Duterte sa prisohan kon mahatagan siya og “interim release” o kon ma-absuwelto sa kasong Crimes Against Humanity;

-o0o-

• Mahatagan lang og “interim release” si Duterte kon makumbinser ang mga huwes sa ICC nga dili niya sabotaheon ang husay ug dili niya hudlaton ang mga testigo (nga imposibleng mahitabo tungod sa paghulga sa iyang mga dumadapig dili lang sa mga tagtungod sa mga biktima sa extrajudicial killings kon dili hasta na sa mga huwes sa Pre-Trial Chamber 1 nga maoy nipadakop niya); ug

• Ma-absuwelto lang si Duterte kon dili makumbinser ang mga huwes sa ICC sa mga ebidensiya batok niya human sa husay nga kasagaran molungtad og duha ngadto sa 10 ka tuig (nga imposibleng mahitabo tungod sa kadaghan sa mga testigo, nga naglakip sa sinugo niyang mga berdugo sa Davao Death Squad, ug mga ebidensiya nga naglakip sa iyang balikbalik nga pagkumpisal sa responsibilidad sa EJKs).