Nganong na-syut sa buyot

Gi-detalye ni kanhi senador Antonio Trillanes IV ang mga panghitabo nga niresulta sa malinawon nga pagdakop sa Ninoy Aquino International Airport (NAIA) ug paspas nga pagpriso sa International Criminal Court (ICC) sa The Hague ni kanhi presidente Rodrigo Duterte:

•Nilupad si Duterte paingon sa Hong Kong niadtong Marso 8 human nakadungog nga posibleng ipadakop siya sa ICC tungod sa Crimes Against Humanity;

•Bisan sa tambag nga magpabilin sa Hong Kong sulod sa pila ka adlaw aron pagpaniid duna ba g’yuy arrest warrant, nihukom si Duterte pagpauli kay wala siya ganahi sa pagkaon, wala makatarong sa pagkatulog, ug gimingaw sa iyang moskitero sa Davao;

***

•Nituo si Duterte sa pasalig sa mga opisyal sa gobyerno nga nagpabiling loyal niya nga wala silay nakita nga hard copy sa arrest warrant;

•Mosakay unta si Duterte og private jet gikan sa Hong Kong nga direktang motugpa sa Davao International Airport pero maabtan og pila ka adlaw ang paghikay sa clearances;

•Gipahibawo ni kanhi presidential spokesperson Harry Roque nga mopauli si Duterte human sa lima ka adlaw nga pagduaw sa Hong Kong sakay sa flight sa Cathay Pacific nga motugpa sa NAIA Terminal 3 sa alas-4:35 sa hapon niadtong Marso 11;

***

•Laing Cathay Pacific flight ang gisakyan ni Duterte, nitugpa sa NAIA 3 sa alas-9:20 sa buntag sa Marso 11, sa kabalaka nga maabtan sa warrant kon mahapnan;

•Giandam ang laing private jet nga modala niya gikan sa NAIA paingon sa Davao aron dili maapsan kon dunay warrant;

•Wala mahibaw-i ni Duterte nga ang hard copy sa warrant nga gipaagi sa International Criminal Police Organization (Interpol) nadawat sa kapolisan sa alas-3 sa kadlawon, kapin sa unom ka oras sa wala pa siya motugpa, maong napakatap ang 379 ka operatiba sa Special Action Force sa NAIA;

***

•Alas-10 na sa buntag nahukman nilang Presidente Ferdinand Marcos Jr., Defense Secretary Gibo Teodoro, Interior Secretary Jonvic Remulla, ug National Security Adviser Eduardo Año nga dad-on dayon si Duterte sa The Hague pinaagi sa private jet;

•Nakabiya ang jet sa alas-11:03 sa gabii niadtong Marso 11; ug

•Napakyas si Duterte pagpangayo og political asylum sa United Arab Emirates atol sa layover sa Dubai.