Ang mga anghel nga magbalantay

Sila ang mga langitnong binuhat nga gitudlo nga magbantay ug manalipod sa mata'g tawo sa iyang panaw dinhi sa kalibotan. Matud pa sa Katesismo sa Simbahang Katoliko: “ Gikan sa atong pagkahimugso hangtud na sa kamatayon ang tawhanong pagkinabuhi ang giliyokan man nila sa ilang mabinantayong pagbantay ug pagpangama. (CCC 336), “From infancy to death,  Ang Balaang kasulatan nagdason nga anaa gyud ang mga anghel. Ang Salmo nagkanayon: Kay ang Dios nagmando sa iyang mga anghel aron pagbantay kanimo sa tanan nimong pagabuhaton.[2] Si Jesus mismo nidason niiini sa iyang pag-ingon: “Ayaw ninyo tamaya kining mga gagmay’ng mga bata. Sultihan ko kamo  nga ang ilang mga anghel anaa kanunay sa atubangan sa akong Amahan nga atua sa langit. Nagpadayag lamang kini kun unsa kasuod ang atong mga Anghel nga Magbalantay ngari kanato ug ngadto sa Dios. Ilang kaakuhan ug gimbuhaton ang makanunayong pagpangama alang kanato.

Misyon ug Gimbuhaton sa mga Anghel nga mga Magbalantay

Sila ang panalipod sa atong lawas ug kalag. Kun ang atong kabubut-on nahiuyon sa Diosnong pagbuot, ang mga anghel motabang aron mahatagan og katumanan ang Diosnong laraw alang sa atong kinabuhi, lakip na niini ang pagdala kanato ngadto sa langit aron mahiusa kita sa Dios hangtud sa hangtud. Motabang sila kanato sa mga butang nga makatampo sa atong pagtubo diha sa kabalaan ug sa birtud.

Dili sila manghilabot sa atong mga hukom o desisyon bisan pa man kun kini nahasupak sa kabubut-on sa Dios. Andam ug tagana silang motabang kanato diha sa pagtuman sa kabubut-on sa Dios diha sa atong kinabuhi.

 Andam silang manalipod kanato batok sa mga dautang mga espiritu. Busa angayan lamang nga ato silang sangpiton sa kanunay.

Sa takna sa atong kamatayon, sila kadtong modala kanato atubangan sa Trono sa Paghukom sa panahon nga ang matag usa kanato pagahukman sa Dios. Mahimo kitang dad-on nila ngadto sa langit, purgatoryo o impiyerno segun sa makatarunganong paghukom sa Dios kanato nga sibo sa atong nabuhat.

Kun kita pagadad-on sa purgatoryo aron kita pagalimpiyohan ug hingpiton ang mga anghel nato nga magbalantay ang magpaabot gyud kanato hangtud nga mamahimo kitang andam na nga mosulod sa Gingharian sa Langit. Sila gyud ang atong maunonon ug  matinud-anong mga higala nga gitagana sa Dios alang sa matag usa kanato. matag usa kanato adunay kaugalingong anghel nga magbalantay.

Ang atong mga anghel nga magbalantay gikan sa hirarkiya sa mga angheles. Sila ang pinakaubos nga hut-ong sa maong orden sa mga angheles.