Mas dako, mas nindot  nga 14th Alegado Cup kasado na

CEBU, Philippines — Mas dako ug mas nindot ang ika-14 nga edisyon sa Mayor Teresa “Nene” P. Alegado Fiesta Cup didto sa Consolacion diin 18 ka mga sports events ang kumbatihan sunod bulan.

Ang makasaysayanong inter-collegiate basketball tournament diin unom ka teams gikan sa Cebu Schools Athletic Foundation, Inc. (CESAFI)ang magbugno maoy mosikad sa usa ka bulan nga aksiyon karong Septiyembre 7 didto sa Consolacion covered court.

Mag-ilog sa P100,000 nga nag-unang ganti mao ang two-time CESAFI defending champion University of the Visayas (UV) Green Lancers, University of San Carlos (USC) Warriors, University of Southern Philippines Foundation (USPF) Panthers, University of the Philippines (UP) Cebu Fighting Maroons, Benedicto College Cheetahs, ug Cebu Roosevelt Memorial Colleges (CRMC) Mustangs.

Sa laing bahin, ang mga kategoriya sa inter-barangay naglangkob sa midget (17 Under), SK juniors (24 Under), ug seniors (25-above).

Gawas sa basketball, banatan sab sa mga atleta sa lungsod ang volleyball, sepak takraw, badminton, billiards, lawn tennis, boxing, taekwondo, karatedo, dayon-dayon volleyball, motor racing, 4x4, trailcross, table tennis, chess, ug longboarding.

Dugang niini, dunay ipahigayon nga Call of Duty ug Mobile Legends nga kompetisyon.

Ang tinuig nga kalihukan hugtanong gipaluyohan ni mayor Teresa "Nene" Alegado, vice mayor Rey Damole, konsehal Alforque Ouano, Marilou Casul, Lalinka Villo, Fred Herrera, Leo Napuli, Ben Ermac, Brandon Cuizon, ug Salome Palang, ABC President Wesley Alomiren, ug SK Federation chairperson Shella Arela Carpina uban ni Paul Alelu Flores isip commissioner.