EDITORYAL - Kinsa kining ‘Padrino’ sa POGO?

Unsa pa may gipaabot sa taga Philippine Amusement Gaming Corporation (PAGCOR) kun kinsa kining kanhi cabinet member sa administrasyong Duterte nga maoy ni-lobby o maayo aron makasulod dinhi sa Pilipinas kining Philippine offshore gaming operators (POGO)?

Ang Senate Committee on Women and Children and Gender Equality ug ang katawhan naghinam-hinam na nga masayod kun kinsa kining tawhana.

Kaning POGO gipadagan og mga Chinese gambling operators gikan sa mainland China tungod kay bawal man didto ang sugal. Sagad sa ilang mga mamustahay ilaha rang mga kababayan.

Bilyones ka pesos ang matud pa nakolekta sa gobiyerno gikan sa POGO kada tuig mao nga bisan og daghan ang nisupak dinhi tungod sa dakong kadaut nilang nahimo nga maoy rason nganong gipalayas sila gikan sa nasud sa Myanmar.

Karon, ang Pilipinas napud ang nagproblema sa mga krimeng kaluha na sa POGO, sama extortion, kidnapping, tortures, human trafficking, ug nahimo sab kining ‘cover’ sa mga sindikato sa ilegal nga drugas nga karon ‘kinilo ug tonelada na.’ Labaw sa tanan, hulga sa nasudnong seguridad sa Pilipinas tungod gidudahang gigamit kini aron makasulod ang daghang mga espiya sa gobiyerno sa China dinhi aron maniid ug mosabotahi sa gobiyerno kay gusto nilang ilugon ang West Philippine Sea.

Usa sa mga notadong indibidwal nga nasakpan mao ang mayor sa Bamban, Tarlac nga si Alice Guo nga ang tinuod nga pangalan matud pa sa National Bureau of Investigation mao si Guo Hua Ping nga usa ka Chinese national nga kahibulongang nibutho sa panahon sa administrasyong Duterte.

Nidagan siya pagkamayor sa Bamban ug kahibulongang nakadaog bisan wala kaayoy nakaila kaniya didto.  Dihang nahimo na siyang mayor usa siya sa mga responsable sa pagtukod og POGO complex didto sa iyang lungsod.  Gironda kini sa mga otoridad tungod sa human trafficking ug uban pang online scamming operations ug didto nabisto ang iyang mga tinaguan.

Siguradong daghan pang kanhi opisyal sa nakalabay nga administrasyon ang nalambigit ug nakasapi sa operasyon sa POGO nga wala masayod ang katawhan.

Kay nabutahan sa mga bulatik ug pagbuhat og mga isyu batok sa mga karibal sa politika nga maoy natutokan sa mga tawo ug walay nakabantay sa tinuoray nga panghitabo luyo niining tanan.