Nasobrahan sa ka-estrikta si madam

"YOU ARE INVADING OUR PRIVACY!" mao kini ang gisugat nga pulong sa asssistant principal sa usa ka tunghaan sa dakbayan sa Sugbo dihang nagpahigayon og ocular visit ang kapolisan pinangulohan mismo ni Police Col. Ireneo Dalogdog kauban ang mga sakop sa media sa usa ka eskwelahan nga gihimong billeting quarter sa mga atleta sa Palarong Pambansa 2024.

Anaa pa lang gani sa gate sa tunghaan, estrikta na kaayo si mam nga nikompronta ilabi na mga sakop sa media nga wala man lang mangutana unsay tumong ug katuyoan nganong niadto sa ilang tunghaan ang kapolisan ug ang mga tigbalita.

Maayo pa kaayo namong pahiyom nga nangatahoran kaniya nga "good morning ma'am" ug mao to ang iyang gibatbat nga pulong nga murag grabe na mi ato ka intruder sa ilang tunghaan, maong mitubag kang pud tawo ko nga "mam kaestrikto ba ninyo diri, ang ubang mga eskwelahan mapahiyomon ug maabi abihon kaayo nga malipay nga dunay mangumusta sa ilang sitwasyon"

Dinhi nagkahinay ang assistant principal nga mipasabot nga dili kuno pwede litratohan ug videohan ang dekorasyon sa billeting quarter kay contest man pud diay kini sa Palarong Pambansa 2024 kay sekreto gyud. Kong gipatigbabaw lang niya ang courtesy makasabot ra gyud ang mga sakop sa media ug labaw na ang mga pulis, dili na kihanglan pa nga mowitik siya ug sakit ug pang insulto nga pulong.

Nakapangutana ang ubang mga reporter nga kanus-a ra man nahimong pribado ang usa ka public school nga dili man pwede masudlan sa ubang mga tawo? kana bitawng masobrahan ra sa ka estrikta nga mawagtang iyang pagpakigdait sa iyang isig ka tawo. Mga tawo baya pud ang mga sakop sa media ug dili sa paghinambog mga professional sama nila nga iyang ginawong nga intruder.

Nakahimo siya og tratar niadto sa mga sakop sa media ug mga opisyal sa pulis, unsa na kaha sa ubang mga tawo, sa tinon-an ug mga ginikanan sayon sayonon ra seguro niya og singka pastilan.

In fairness baya sa principal aning eskwelahana buotan baya kay ako man ni nga ma interview ilabi na kong dunay mga school activities kay maagian ra man ang ilang tunghaan kong mosaka na mi sa GMA ug labaw sa tanan buotan kaayo ang ilang mga opisyal sa DepEd sa City ug Regional level nga approachable kaayo one call, one text away motubag with utmost courtesy pa.

Motoo na unta ko nga estrikto siya nga dili pasudlon ang media sa billeting area, apan dihang niadto mi sa Mabolo Elementary School hilabihan man ka buotan ang mga nagdumala didto, sa gate pa lang mapahiyomon na kaayo sila ug labaw na ang delegasyon nila gikan sa Cordillera Administrative Region kinsa midalit pa og kape sa mga sakop sa media ug sa kapolisan, angayan ni silang dayegon ug palakpakan kay maayo kaayo silang makigdait sa ilang isig ka tawo.

Makasabot kita sa protocol nga ipatuman kong tarongon lang og estorya dili lang ipakagamay ug kasab-an kay kitang tanan tawo ra. Dili ra nako mention ang ngalan sa eskwelahan apan sa iyang iconic nga pulong segurado makahinumdum siya aron ma-review niya unsahon ang pagpakigsandurot sa mga tawo.