EDITORYAL - Police checkpoints

Dugay na kaayo kini nga bagulbol sa mga motoristang magsakay og motorsiklo, nganong sila ray parahon diha sa mga police checkpoints ug palabyon ra ang mga 4-wheeled nga mga sakyanan.

Dili kay tungod kay daghan sa mga krimen binuhatan man sa mga tawong magsakay og motorsiklo sama sa mga riding-in tandem nga mga mamumuno, tulisan, esnatser, ug mga drug couriers, kondili, moresulta kini sa grabeng traffic diha sa kadalanan kun ang mga 4-wheel nga sakyanan parahon aron susihon ang mga dokumento niini ug sa drayber.

Tinuod daghan sa mga krimen apan wala magpasabot nga kasagaran sa mga krimen binuhatan lang sa mga nagsakay og motorsikllo. Dili kana tinuod tungod kay daghang mga krimen nga ang nagbuhat mga nakasakay og sakyanan o awto.

Gani kaning mga pinangita sa balaod pobre man o mga kwartahan, dili na magsakay og motorsiklo ilabi na nasayod silang mao kini kinaham parahon diha sa mga police checkpoints.

Mas labaw nga dili mosakay o mogamit og mga motorsiklo kining mga dagkong sindikato sa ilegal nga drugas sama niadtong mga Chinese drug suspects nga nangadakpan sa mga drug bust sa kapolisan diin milyones ka pesos nga ilegal nga drugas ang nangasakmit.

Karong bag-o, si Philippine National Police chief Gen. Rommel Francisco Marbil mimando sa tanang police checkpoints nga apilon na ang mga sakyanan kay matud pa niya ang mga kriminal dili tanan magmotorsiklo lang, dako kining tinuod.

Dapat sab tingaling pahimangnoan ni Marbil ang mga ginsakupan nga kaning mga polis sa checkpoints, kinahanglang mosunod gyud sa mga guidelines ug dili maoy hinungdan sa kahasol sa mga inosenteng motorista.

Angay pud tingaling apilon sa pagpahimangno sa PNP Chief kining mga force multipliers nga motabang sa checkpoint, kay daghan kanila ang sobra ka agresibo ug molabaw pa sa polis, dili man gani mangayo og katahuran sa riders, diretso ra pinabundak og pangayo sa lisensiya ug rehistro nga daw sad-an ang motorista.

Daghang ang nangutana kun kining mga force multipliers legal bang makamando sa motorista paghatag sa ilang lisensiya, OR ug CR kay murag mao naman ni karon ang pirmeng nahitabo sa kadalanan atol sa mga checkpoints dinhi sa Sugbu.