Pasugalan na kasabwat ilang pulis sa Batangas, iniimbestigahan

BATANGAS, Philippines — Iimbestigahan ng Batangas Police Provincial Office (BPPO) ang mga ulat ng umano’y laganap na operasyon ng iligal na sugal sa lalawigan, gayundin ang posibleng pagkakasangkot o pagprotekta rito ng ilang pulis.

Inatasan na ni Batangas Provincial Director Col Oliver Ebora ang mga kinauukulang police unit na beripikahin ang mga ulat, paigtingin ang operasyon laban sa iligal na sugal at imbestigahan ang mga alegasyon laban sa mga pulis.

Binigyang-diin ni PD Ebora na dapat ibukod ang lehitimo at awtorisadong operasyon ng Small Town Lottery o STL sa mga ilegal na gawain tulad ng bookis, hindi awtorisadong pa-number games, sakla, color games at iba pang uri ng sugal na walang kaukulang pahintulot.