Madi Mojdeh sisisid ng ginto sa NCAA Season 102

MANILA, Philippines — Ilalabas ni Behrouz Mohammad Mojdeh ng La Salle Green Hills ang buong puwersa nito para makahirit ng podium finish sa NCAA Season 102 swimming competitions na magsisimula ngayong araw sa Rizal Memorial Sports Complex sa Manila.
Nakatakdang umarangkada si Mojdeh sa pitong individual events kabilang na ang 200m Individual Medley at 200m backstroke na aarangkada sa opening day ng pinakamatandang collegiate league sa bansa.
Masisilayan din ito sa 200m breaststroke, 200m butterfly, 800m freestyle, 400m freestyle at 400m Individual Medley.
Bahagi si Mojdeh ng La Salle Green Hills squad na dedepensahan ang korona nito sa ngayong season matapos matagumpay na makamit ang kampeonato noong nakaraang taon.
“I’m ready to represent La Salle Green Hills at NCAA Season 102. As defending champions, we’re coming into this season ready to compete, put in the work, and fight to keep the title,” ani Mojdeh sa kaniyang post sa social media.
Magarbo ang debut ni Mojdeh noong NCAA Season 101 kung saan itinanghal itong Rookie of the Year matapos umani ng limang medalya — apat na pilak at isang tanso.
Nakapilak si Mojdeh sa 200m backstroke, 200m butterfly, 1500m freestyle at 800m freestyle, at tanso sa 200m breaststroke.
Kaya naman sumalang sa matinding preparasyon si Mojdeh sa off season upang masiguro na handang-handa ito para sa season na ito.
“After countless hours of training, it’s time to put everything to the test. We know it won’t be easy, but we’re ready to give our best in every race and represent our school with pride,” dagdag ni Mojdeh.
Makakasama ni Mojdeh sa kampanya ang kapwa Behrouz Elite Swimming Team (BEST) tanker na si Yugo Cabana na hahataw din sa pitong individual events.
Masisilayan si Cabana sa 200m IM, 200m butterfly, 100m butterfly, 50m butterfly, 100m freestyle, 50m backstroke at 100m backstroke.
- Latest




















