Walk-through ug handheld metal detectors giapud sa mga eskuylahan

CEBU, Philippines — Aron mapalig-on ang seguridad sa mga eskwelahan ug mapanalipdan ang mga estudyante ug kawani niini, gi-turnover sa Mandaue City Government ang pito ka walkthrough metal detectors ug 50 ka handheld metal detectors ngadto sa mga publikong eskwelahan sa siyudad.

Gipangulohan ni Mayor Thadeo “Jonkie” Ouano ang turn-over ceremony niadtong Huwebes, Nobyembre 5, sa Mandaue City Comprehensive National High School (MCCNHS) sa Barangay Centro. Ang pito ka eskwelahan nga napili nga makadawat sa walkthrough metal detectors mao ang pipila sa dagkong publikong elementarya ug high school sa Mandaue City.

Lakip niini ang Don Gerardo Ouano Memorial National High School (DGOMNHS), Mandaue City Central School, Paknaan National High School, Canduman National High School ug Subangdaku Elementary School. Magamit kini pag-detect kun dunay mga armas o hinagiban nga ipalusot sa mga eskuylahan tungod sa nahitabong mga krimen sa mga eskuylahan sa nanglabay nga mga buwan. Sa MCCNHS, gigamit na sa mga estudyante ang walkthrough metal detector atol sa turn-over activity.

Misulay usab si Ouano sa pag-agi niini.  “The goal of the city is the safety sa mga estudyante og magtutudlo and school personnel,” matod ni Ouano.

Resulta ang maong inisyatiba sa multi-agency meeting nga gipatawag ni Ouano niadtong Agosto 19, diin mitambong ang mga representante sa Mandaue City Police Office (MCPO), Department of Education (DepEd)-Mandaue City ug nagkadaiyang departamento sa city government. --  IBM BANAT NEWS