3 ka SRDC Greyhounds moduwa sa New Zealand
MANILA, Philippines — Tulo ka players sa San Roque College de Cebu (SRCDC) Greyhounds sa Cebu Schools Athletic Foundation, Inc. (CESAFI) ang mosalmot sa usa ka internasyonal nga torneyo sa basketball didto sa New Zealand duha ka semana gikan karon.
Kini mao sila si John Raven Dumanhug sa Tabogon, Anthony Ross Luche sa Daanbantayan ug Bert Nathan Curimao sa dakbayan sa Lapu-Lapu.
Ubos sa paggiya ni coach Jeff Codera, ang tulo ka pambato sa SRCDC kabahin sa Sunsport New Zealand team nga mopakita'g aksiyon sa HoopNation Tauranga Classic gikan sa Oktubre 23 hangtod 26 sa Mercury Baypark Arena sa Mount Maunganui, Tauranga, New Zealand.
“Ang pag-apil sa usa ka internasyonal nga torneyo dili lang kay hatagan sila og higayon nga makaduwa og basketball sa mas dako nga entablado,” matod ni Codera, nga miyembro sa Golden State Warriors training camp sa NBA kapin sa usa na ka dekada.
“Mahitungod kini sa paghatag kanila og higayon nga molambo, sukdon ang kaugalingon nilang kapasidad, makat-on gikan sa labing maayo ug madiskobrehan ang tinuod nilang mahimo isip mga magdudula.”
“Dili kanunay moabot ang mga oportunidad nga sama niini. Gawas sa pagdaog, bililhon usab ang kasinatian ug mga leksiyon nga ilang makuha sa pag-atubang sa mga koponan gikan sa ubang nasod. Gusto nako nga pahimuslan nila ang matag higayon,” dugang pa ni Codera.
Gikatakdang molarga paingon sa New Zealand si Codera ug ang iyang mga magdudula karong Lunes, Oktubre 12.
Sa labing una nilang season sa primerong inter-school nga liga sa Sugbo, ang SRCDC Greyhounds nagkupot og 2-3 win-loss rekord sa nagpadayong CESAFI Season 26.
- Latest
