Fajardo nanoktok sa laing dungog sa iyang karera
CEBU, Philippines — Ang bitoon sa San Miguel Beer nga si June Mar Fajardo misikit ngadto sa laing rekord sa masilakon niyang karera.
Human mipabuto og 25 puntos uban ang 12 ka rebounds sa 135-105 nilang demolisyon sa Terrafirma sa PBA Season 50 Governors Cup niadtong Miyerkules sa gabii, ang nine-time MVP mipaduol ngadto na lang sa singko puntos aron mamahimong labing bag-ong miyembro sa 10,000-point club sa liga.
Si Fajardo, nga mag-37 anyos na karong Nobiembre 17, duna untay higayon nga kab-oton ang maong dungog ko miduwa pa siya sa katapusang kuwarter. Apan wala na kini niya buhata kay dako na kaayo sila og labaw.
“Hindi ko naman chine-chase yun,” matud pa ni Fajardo human sa duwa. “Pero thankful ako na makasama dun sa 10,000-point club. Isang karangalan na mapabilang ako dun. Pero hindi ko hinahabol. Darating at darating yun.”
Kon opisyal na kini niyang makuha, si Fajardo mamahimong ikaduha pa lamang nga aktibong player human ni Jayson Castro, ikalima sa kasaysayan sa San Miguel, ug ika-19 nga kinatibuk-an nga maapil sa halangdong listahan.
Gusto gyud unta ni SMB coach Leo Austria nga makab-ot ni Fajardo ang maong dungog niadtong Miyerkules apan mibalibad ang garbo sa Pinamungajan, Cebu kay mas gipili niini nga mahatagan og tsansa nga makaduwa ang iyang mga teammates nga dili kaayo gamiton.
“Actually, gusto ko sana siya ibalik in the fourth quarter because of the milestone. Pero he refused to do that. He wanted his teammates to play and have long playing time inside. Dahil alam naman niya na nandun pa rin yung chances sa next games,” padayag pa ni Austria
“That’s the good thing for a great player like him: talagang he’s thinking of his teammates,” dugang pa ni Austria.
- Latest
