54 pamilya apektado ng sunog sa Muntinlupa

MANILA, Philippines — Nasa 54 pamilya o 171 indibidwal ang apektado ng sunog na sumiklab sa isang residential area sa Brgy. Alabang, Muntinlupa, nitong Huwebes.

Sa ulat ng Muntinlupa City Fire Station na nagsimula ang sunog dakong alas-6:16 ng gabi ng Oktubre 8, sa Purok 4 Extension, Alabang, na umakyat lang sa unang alarma alas-6:23 ng gabi.

Pagsapit ng alas-7:17 ng gabi ay idineklarang fire under control at tuluyang naapula alas-7:55 ng gabi.

Nasa kabuuang 26 na truck ng bumbero na kinabibilangan ng Bureau of Fire Protection (BFP) at volunteers.

Sa isinagawang mapping at assessment ng Social Services Department (SSD) iniulat naman kay Mayor Ruffy Biazon na nasa 30 kabahayan ang natupok.

Nabigyan ng non-food items tulad ng sleeping kits at hygiene kits, at food packs ang mga pamil­yang apektado, na karamihan ay nanunuluyan sa covered court ng Alabang Elementary School.

Kabuuang 16 na fire truck, 10 volunteer truck, isang ambulansya, at isang rescue vehicle ang rumesponde sa insidente. Patuloy pang inaalam ang sanhi ng sunog at halaga ng napinsalang ari-arian.