Rotary dili na modawat sa P1M nga ihatag sa siyudad

CEBU, Philippines — Pasumitehon og letter of intent ang Rotary District 3860 – District Conference Cebu 2026 human kini mipahibalo kang Mayor Nestor Archival nga dili na sila mahinayon og pagpangayo sa P1 milyones nga reimbursement alang sa pagpahigayon og kalihukan niadtong Mayo 2026.

Sa nasayran gikwestyon ni Konsehal Harold Kendrick Go ang pagpangayo sa maong kantidad gumikan kay ang ilang kalihukan walay apil sa prayoridad sa siyudad ug dili makiangayon nga gamiton ang pundo sa publiko.

Matud ni Kenneth Siasar kinsa Chief of Staff ni Mayor Archival nga padayon nga gihatagan og suporta sa mayor ang mga kalihokan ug programa sa Rotary sa siyudad. Sa usa ka miting tali sa kampo sa mayor ug mga representante sa Rotary, gipasabot nga andam unta ang mayor nga mohatag og assistance nga mokabat sa P1 milyon, basta walay legal impediment ug adunay tukmang pagtugot gikan sa konseho.

Apan human nahimong isyu sa publiko ang maong pinansyal nga tabang ug misunod ang lain-laing reaksyon, namati ang mayor sa kabalaka sa publiko.

Sa unang higayon nga miduol ang mga opisyal sa Rotary, ilang giklaro ang ilang tuyo nga dili mangayo og pinansyal nga tabang alang sa usa kalihukan, kundili aron makatabang ug mapadayon ang ilang mga kalihukan nga motabang sa komunidad.

Matud pa ni Konsehal Nyza Archival nga aktibo ang rotary sa pagtabang sa siyudad ilabi na sa pagpalambo sa pampubliko nga tunghaan, library ug uban pa nga mapahimuslan sa publiko.  Samtang, gipahibalo sa Rotary nga posible usab nga dili na nila dawaton ang pinansyal nga tabang gikan sa kagamhanan bisan pa og maaprubahan kini sa konseho.

Tungod kay naaprubahan na ang maong kantidad ug dili na modawat ang Rotary, gihangyo sa mayor ang Rotary nga mosumiter og pormal nga suwat o letter of intent nga isaysay nga dili na nila dawaton ang tabang gikan sa siyudad.

Bisan pa sa isyu sa tabang pinansyal, giklaro sa kampo sa mayor nga magpadayon ang maayong relasyon tali sa Rotary ug sa kagamhanan. (BANAT NEWS)