Sara ug Baste

Hinaot nga nakaamgo na si Davao City Mayor Baste Duterte. Mas lisod balibaran ang supina gikan sa Senate impeachment court. Kay sa iyang hagit pakigsinumbagay ni Heneral Nicolas Torre III. Nga gidawat ni Torre pero wala tungaha ni Baste sa Hulyo sa niaging tuig.

Makahimo siya pagtakda og dinaliang biyahe ngadto sa ubang kanasuran (aron paglikay ni Torre nikalit siya og larga para Singapore). Makahimo gani pag-imbento og sakit. Mahimong managana ang korte pagpadakop niya. Pero iyang ma-semento ang tatak Duterte: Isog sa sulti pero mokakak kon kinahanglan nang moatubang.

-o0o-

Kon isnabon ni Baste ang imbitasyon sa korte sa Miyerkules sunod semana, igo lang niyang sundon ang mga nag-una sa duyan:

•Iyang maguwang, si Bise Presidente Sara Duterte, isog nga nipasidaan og bloodbath sa mga senador ug mga kongresista kon mahinayon ang impeachment pero dihang nagsugod nang husay nidangop sa mga palusot ug nagpasalipod sa iyang defense lawyers; ug

•Iyang amahan, si kanhi presidente Rodrigo Duterte, nanginsulto ug nanghagit og debate parte sa West Philippine Sea pero, dihang nidawat si retired Supreme Court senior associate justice Antonio Carpio, nikakak.

-o0o-

Maglisod si Baste pagpasabot sa minilyon ka pesos nga catering contract sa Davao City Hall nga iyang gisudlan isip mayor uban sa kompaniya ni Sara:

•Ang Gencorp Industries nalista sa statements of assets, liabilities and net worth ni Sara ug dili ignorante si Baste sa balaod nga nagdili niya pakig-transaksiyon uban sa mga paryente; ug

•Dili kapasangil nga nasipyat si Sara paglista sa Gencorp sukad 2013, apil sa katuigan nga bise presidente na ug busa gidid-an sa Konstitusyon pagnegosyo.

-o0o-

Kon nagtuo si VP Sara nga ang pagdumili niya pag-atubang sa senator-judges makapalubay sa mga ebidensiya batok niya, dunay mga timaan nga labihan niyang sayopa:

•Kon mapugos si Baste sa pag-testify, ambot unsa pay iyang mga transaksiyon nga mahibaw-an kay gisupina ang tanang kontrata sa City Hall sukad 2020 dihang si Sara pay mayor; ug

•Kon hinayunon og supina ang iyang bana nga si Atty. Mans Carpio, ambot unsaon pagpasabot ang gatosan ka milyon ka pesos nga nisulod-gawas sa ilang bank accounts sa iyang pagka bise mayor (2007-2010) ug pagka mayor (2010-2013).