Cheetahs Miwani sa Webmasters nagsolo na sa liderato bitbit ang 3-0 rekord

CEBU, Philippines — Ang Benedicto College (BC) Cheetahs midominar sa University of Cebu (UC) Webmasters, 67-50, sa usa ka sangka tali sa way pilding mga koponan sa Cebu Schools Athletic Foundation, Inc. (CESAFI) Season 26 basketball tournament niadtong Martes sa gabii, Septiyembre 15, sa Cebu Coliseum.

Si Serge Gabines mikadlit og 18 puntos, siyam ka rebounds, usa ka assist, upat ka steals ug usa ka block, samtang si John Carlo Sabroso midugang og 15 puntos, tulo ka rebounds, upat ka assists ug duha ka steals alang sa Cheetahs, nga nagsolo na karon sa liderato sa college division uban ang perpektong 3-0 rekord.

Nagparamdam sab si Kenneth Babalcon uban ang nuybe puntos, 11 ka assists, pito ka rebounds ug upat ka steals alang sa Cheetahs, nga kontrolado kaayo and duwa sukad sila misirit ngadto sa sayong 20-10 nga labaw nga ila pang gipaburot ngadto sa 20 puntos sa naghinapos nga bahin sa duwa.

Si Ricofer Sordilla adunay 11 puntos ug lima ka rebounds alang sa Webmasters, nga naputol ang tulo ka sagunson nga daog. Nadoble ang kalipay sa Benedicto College kay ang Baby Cheetahs sa sayo pa mikastigo sa San Roque College de Cebu (SRCDC) Greyhounds, 70-50.

Si Jake David Guanco mipupo og 13 puntos, lima ka rebounds, upat ka assists ug usa ka steal, samtang si Rajnish Butaslac miamot og 10 puntos, upat ka rebounds ug usa ka steal sa dihang gipakgang sa Baby Cheetahs ang duha nila ka sunod-sunod nga kapildihan.

Nakakuha lamang og saytes puntos si Christeim Gascon apan mipupo og 14 ka rebounds, upat ka assists ug lima ka steals alang sa Baby Cheetahs, nga wala na molingi pa sukad giablihan nila ang duwa pinaagi sa nagkayong 19-6 rally.

Si Anthony Ross Luche mitali og 14 puntos, upat ka rebounds, usa ka assist ug duha ka steals, apan dili kini igo paglikay sa Greyhounds nga makatilaw sa una nilang pildi.