Lapu-Lapu padayong nanginit sa Governor's Cup Basketball

CEBU, Philippines — Ang Lapu-Lapu City mibugha sa Medellin, 92-48, aron pagpabiling way pildi sa Governor's Cup Under-18 Basketball Tournament niadtong weekend.

Si John Clyde Undag mipupo og 19 puntos, tulo ka assists, upat ka steals ug usa ka rebound aron pangulohan ang Lapu-Lapu ngadto sa ikatulo nilang sagunson nga daog.

Sila si Marcus Gavin Lozano ug Reyann Nino Rivera midugang og 10 puntos matag usa alang sa dominante kaayong Lapu-Lapu, nga sa usa ka higayon milabaw og 46 puntos.

Sa laing bahin, ang Naga City, Moalboal ug Ginatilan miposte sa ikaduha nilang sunod-sunod nga daog.

Si Jack Ely Asildo mikadlit og 18 puntos, unom ka six rebounds, usa ka assist ug upat ka steals sa dihang gilampornas sa Naga ang Alegria, 101-71.

Sila si Rhyvine Berdin ug Kylle Adrian Mendoza nagkubinar og 30 puntos, 14 ka rebounds, walo ka assists ug pito ka steals, samtang si Kendrick Lapure mitampo og 12 puntos, 10 ka rebounds, tulo ka assists ug unom ka steals alang sa Naga.

Si Lym Salatan miharos og 29 points, lima ka rebounds ug upat ka steals aron ituboy ang Moalboal ngadto sa 81-68 nga pagpakaging sa Boljoon, 81-68,  samtang si Jhon Verny Donque mikolekta og 19 puntos, pito ka rebounds, duha ka assists ug pito ka steals aron ibandera ang Ginatilan ngadto sa 83-76 nga pagpayaka sa Dumanjug.

Sa ubang resulta, ang Daanbantayan nakaipsot sa Asturias, 84-80; ang Samboan mipailuhod sa San Fernando, 63-53; ang Cordova nakalingkawas sa San Remigio, 53-50; ang Danao City mipasukarap sa Catmon, 88-75; ug ang Alcoy mipatigbabaw sa Alcantara, 86-79.

Si Selvan James Inot maoy nangu sa Daanbantayan uban ang 25 puntos, unom ka rebounds ug tulo ka assists, samtang si Ron Nino Lucero midonar og 18 puntos, duha ka rebounds ug duha ka assists.

Mikuha og atensiyon sa Samboan si Marc Russel Pineda uban ang 13 puntos, duha ka rebounds ug duha ka assists ingon man si Joshua Belonguel, nga mitali og otso puntos, 14 ka rebounds, duha ka assists ug usa ka steal.

Si Lance Torralba mihipos og 17 puntos, duha ka rebounds, tulo ka assists ug usa ka steal alang sa Danao. Nakakuha siya og solidong suporta gikan ni Hector Humayag, nga mikimada og 16 puntos, unom ka rebounds, usa ka assist ug upat ka steals, ug ni Phrikxus Jay Ignalig, nga mitimbre og 14 puntos, unom ka rebounds, duha ka assists ug upat ka steals.

Si Jeffritz Nino Saldua ang bida sa Cordova uban ang 14 puntos, pito ka rebounds, unom ka assists ug lima ka steals, samtang si Mc Chamberz Antido mipaulbo og 32 puntos alang sa Alcoy nga iyang gisukipan og tulo ka rebounds, walo ka assists, siyam ka steals ug usa ka block.