Wildcats nagmilagro, Casas maoy bayani

CEBU, Philippines — Si Axel James Casas mipasud sa milagro niyang itsa gikan sa halfcourt sa nahibilin nga punto sayes segundos sa duwa aron aswaton ang Cebu Institute of Technology-University (CIT-U) Wildcats ngadto sa makapaisa'g balahibo nga kadaogan batok sa University of the Philippines (UP) Cebu Fighting Maroons, 71-70, sa  Cebu Schools Athletic Foundation, Inc. (CESAFI) Season 26 basketball tournament niadtong Martes sa gabii, Septiembre 8, sa Cebu Coliseum.

Labaw ang UP Cebu og dos untos sa hilimatyong segundos sa kulbahinam nga sangka, si Casas misul-ot sa kapa sa bayani aron tuldokan ang impresibong pagbalitok sa Wildcats pinaagi sa daw sa dili katuhoan niyang shot.

Sa wala pa milusad ang Wildcats og dalaygong pag-eskapo, nagtoo ang tanan nga usa ka demolisyon ang mahitabo sa dihang ang Fighting Maroons mi-ambak sa mainit nga sinugdanan, 23-10, ug dayon misira sa  first half uban ang dakong bentaha, 51-25.

 Apan ang Wildcats ni coach Felix "Donbel" Belano Jr. maisogon nga miresbak.

Milusad sila og  24-11 nga ataki sa ikatulong kuwarter sa wala pa gitapos ang duwa uban ang nagkayong 22-8 rally nga gituldokan sa nakapadaog nga itsa ni  Casas aron patikalbongon ang Fighting Maroons.

Si Casas mihipos og 10 puntos, upat ka rebounds, duha ka assists ug usa ka steal.

Si John Eimrod Rodulfa mipupo og 15 puntos, unom ka rebounds, duha ka assists ug duha ka steals samtang si Braebon Ali Thompson miposte og  double-double nga 14 puntos ug 11 ka rebounds uban ang upat ka assists ug usa ka block sa dihang ang Wildcats miligid sa ikaduha nilang sunod-sunod nga daog.

Mihimo sab og kasikas si Jerian Marc Abello uban ang 21 puntos, unom ka rebounds, tulo ka assists ug duha ka steals alang sa Wildcats.

Si         AJ de los Reyes ang nag-inusarang player sa UP Cebu nga mikadlit og  double digits uban ang 15 puntos ug duha ka rebounds.

Sa high school level, si Jade Bialan mirehistro og solidong double-double nga 20 puntos ug 15 ka rebounds uban ang lima ka  blocks, usa ka assist ug usa ka steal sa dihang ang University of Cebu (UC) Junior Webmasters misikad sa ilang kampanya uban ang  61-40 nga paglampaso sa Benedicto College (BC) Baby Cheetahs.

Nanghugyaw sab sila si Jay Xander Bulagsak ug John Day Jorquia, nga nagkumboya'g  22 puntos ug ka 12 rebounds alang  sa dominanteng Junior Webmasters, nga sa usa ka higayon milabaw og 24 puntos.

 Gikan sa sayong 12 puntos nga labaw, 19-7, ang Junior Webmasters nakasustinir sa maanindot nilang salida aron pagposte og 49-29 nga bentaha human sa tulo ka kuwarter, nga ilang naprotektahan hangtud sa katapusang segundo.

Si Axel Joseph Oropisa maoy nangu sa nasugamak nga Baby Cheetahs uban ang 17 puntos, lima ka rebounds, usa ka assist ug upat ka steals.