Eala kakasa kay jovic sa 3rd round ng US Open
Oliynykova pinatalsik
MANILA, Philippines — Matapos patalsikin si Oleksandra Oliynykova ng Ukraine ay lalabanan ni Pinay tennis ace Alex Eala si Iva Jovic ng Amerika sa third round ng US Open.
Ito ang ikatlong beses na maghaharap sina Eala at Jovic.
Hawak ni Jovic ang 2-0 head-to-head advantage laban kay Eala.
Nanalo si Jovic sa kanilang unang paghaharap sa first round ng French Open noong Mayo sa Paris, France kung saan naitala nito ang 6-4, 6-2 panalo laban kay Eala.
Tinalo ni Eala si Oliynykova, 6-1, 6-4, habang binigo ni Jovic si Franchesca Jones ng Great Britain, 6-4, 6-4.
Hindi na nagpatumpik-tumpik pa si Eala nang agad itong bumulusok sa first set para makuha ang 1-0 kalamangan.
Tanging nagawa ni Oliynykova ang maitabla sa 3-3 ang second set bago maglatag si Eala ng 3-1 run upang matamis na kunin ang panalo.
Tumagal lamang ang laro ng 63 minuto.
“I was pleased with my patience and my consistency of focus. That was the key to winning the match,” ani Eala.
Muling naging armas ni Eala ang serve nito matapos magtala ng winning percentage na 75 sa first serve at 73 sa second serve. Nakakuha rin ito ng limang break points.
Muling sumaludo si Eala sa Pinoy fans na dumagsa sa venue.
“I think everybody represents something in their own way. I am Filipino and I proudly represent that,” ani Eala.
Masaya ito na nadadala nito ang bandila ng Pilipinas sa international stage kasama ang mga kababayan nitong walang sawa sa pagsuporta sa kanya.
“And a lot of people in the crowd are Filipino and I’m sure they share the sentiment, like Americans, or Ukrainians like Oleksandra, who played so amazingly today. We all represent something and I’m proud of what I represent,” pahayag pa ni Eala.
- Latest
