Ex-BFP chief sinibak, kinasuhan ng graft at bribery
MANILA, Philippines — Sinibak sa serbisyo ng Office of the Ombudsman si dating Bureau of Fire Protection (BFP) chief Jesus Fernandez at kinasuhan sa Sandiganbayan kaugnay ng pagbili ng 132 ambulansya na nagkakahalaga ng P485 milyon.
Ayon sa Ombudsman, tumanggap si Fernandez ng P14.7 milyon mula sa kinatawan ng joint venture na sangkot sa procurement. Lumilitaw na si Fernandez ang chairman ng Bids and Awards Committee (BAC).
Kinasuhan si Fernandez ng 2 counts ng indirect bribery, 2 counts ng paglabag sa Anti-Graft and Corrupt Practices Act matapos makitaan ng prima facie evidence ang kaso.
Sa hiwalay na kasong administratibo, napatunayang nagkasala siya ng grave misconduct at conduct prejudicial to the best interest of the service.
Dahil dito, tinanggal siya sa serbisyo, kinansela ang kanyang eligibility, binawi ang retirement benefits at tuluyan siyang pinagbawalang muling makapagtrabaho sa gobyerno.
Noong Marso, itinalaga si FCSupt. Wilberto Rico Neil Kwan Tiu bilang officer-in-charge ng BFP matapos magsampa ng mga reklamo laban kay Fernandez ang Department of the Interior and Local Government.
- Latest
