Lapu-Lapu nagplano’ng mo host sa 2028 Asian Beach Games

CEBU, Philippines — Gilantaw sa kagamhanan sa Dakbayan sa Lapu-Lapu ang posibilidad nga mahimong host sa 2028 Asian Beach Games nga posibleng magdala og mga atleta ug bisita gikan sa nagkadaiyang nasud sa Asia ug makapalig-on sa turismo ug lokal nga ekonomiya sa siyudad.

Gihisgotan ni Congressman Junard “Ahong” Chan ang posibleng pag-host sa maong continental sporting event atol sa iyang tigom tali kang Leyte 4th District Representative Richard Gomez.

Ang Asian Beach Games magtigom sa mga atleta gikan sa nagkadaiyang nasud sa Asia aron makigsangka sa nagkalain-laing beach, water, martial arts ug individual sports.

Lakip sa mga sports nga gikonsidera ang beach volleyball, beach handball, 3x3 basketball, beach soccer, open water swimming, swimming, jet ski, sailing, windsurfing, surfing ug dragon boat.

Apil usab sa mga sport ang beach judo, beach sambo, beach wrestling, beach MMA, beach jiu-jitsu, beach karate, aquathlon, beach athletics, modern pentathlon, sport climbing ug teqball.

Matud ni Chan nga dili lang sa sports competitions mahimong makita ang epekto sa maong kalihokan, ilabi na sa industriya sa turismo.

Matud sa kongresista adunay higayon ang mga atleta ug bisita nga makabisita sa mga tourist destination sa Lapu-Lapu City ug sa ubang bahin sa Cebu, makatilaw sa lokal nga pagkaon ug makig-interact sa mga residente.

Ang posibleng pag-host sa maong kalihokan mahimong makapahimotang usab sa Dakbayan sa Lapu-Lapu ug Cebu sa international spotlight isip mga destinasyon nga makahimo sa pagdawat og dagkong international sporting events.

Sa pagkakaron, padayon pa ang mga diskusyon kabahin sa posibilidad ug mga pagpangandam alang sa pagdala sa 2028 Asian Beach Games diha sa Lapu-Lapu City. —/BDB (BANAT NEWS)