College student nga nag-bomb joke gikasohan
CEBU, Philippines — Gipasakaan og kaso ang usa ka 20-anyos nga first year college student human kini madakop tungod kay giingong nagbinoang kini og bomb threat samtang gi-inspection ang iyang bag sulod sa usa ka unibersidad sa Lungsod sa Argao niadtong Martes.
Nahitabo ang insidente pasado alas 3:00 sa hapon sa entrance sa maong eskwelahan diin gi-check sa security guard ang bag sa estudyante.
Samtang gihimo ang routine security inspection nihirit ang maong estudyante nga basin adunay bomba sulod sa iyang bag ug mahimong mobuto.
Apan giseryoso sa security guard ang maong pamahayag ug gipugngan ang estudyante.
Gipahibalo sa guard ang Student Affairs Office kabahin sa bomb joke ug nitawag dayon sa kapolisan ang Dean of Student Affairs tungod sa kaseryoso sa maong insidente.
Gitugyan ang maong estudyante ngadto sa kapolisan alang sa tukmang aksyon.
Matud ni Police Staff Sergeant Mark Anthony Dicdican, imbestigador sa Argao Police Station nga gisang-at na ang kaso batok sa nahisgotang estudyante kagahapon.
Ang maong estudyante giingong nakalapasa sa Presidential Decree No. 1727 nga nag-penalize sa malisyosong pagpakatap og bakak nga impormasyon kalabot sa bomba ug mga eksplosibo.
Gipahinumduman sa kapolisan ang publiko nga ang pagbinoang kabahin sa bomba seryosong paglapas ilabi na kini himuon sa airport, pampublikong transportasyon o sulod sa mga eskwelahan. (BANAT NEWS)
- Latest
