Nagdahom nga dili masilotan
Gi-insulto na sab ni Bise Presidente Sara Duterte ang Senate impeachment court. Samtang gibasa ni Presiding Officer Chiz Escudero ang pasidaan nga silotan ang prosecutors ug defense lawyers nga mosupak sa lagda sa sub judice, nipagawas og press statement si VP Sara nga nisaway sa nagpadayong husay.
Gisaway niyang senator judge nga nitawag og estupido sa usa ka testigo, abogada nga nitawag niyang mastermind sa scam ug saksi nga nihingalan niya og brat. Kini samtang padayon siyang nikakak sa pagtambong sa husay ug pagpangunay pagtubag sa mga pasangil batok niya.
-o0o-
Niinsistir si VP Sara nga walay napakita nga mga ebidensiya batok niya. Kini bisan kon gikan sa iya mismong baba ang hulga sa kadlawong dako niadtong Nobyembre 24, 2024 sa pagpatay nilang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez kon dunay mahitabo niya.
Padayon siyang nagpaugat pagpasangil nga nangisda lang ang prosekusyon og mga ebidensiya batok niya bisan gibalibaran na sa Korte Suprema ang iyang awhag nga pugngan ang impeachment proceedings sa House Justice Committee ug ang impeachment trial sa Senado.
-o0o-
Nagpatuyang si VP Sara sa iyang gibati kay masaligon nga walay kaisog (ug kaligdong) si Escudero pagbuyag ug pagsilot niya. Nagtuo nga dili mangahas ang impeachment court sa pagmulta ug pagpriso niya kay hadlok sila sa kasuko sa iyang mga dumadapig.
Kon basehan ang kamingaw sa mga protesta sa iyang grupo ug ang pagdumili sa minilyon ka mga sakop sa Iglesia ni Cristo sa pagpagamit sa iyang kawsa, morag nasobrahan rang bilib sa iyang kaugalingon.
-o0o-
Imbes motuo sa iyang kaugalingong propaganda, angayng pahimuslan ni VP Sara ang bag-o niyang paukyab pagdagkot og kandila sa gibisitang mga simbahan aron pagpasalamat sa Ginoo nga gibugalbugalan sa iyang amahan:
Nga igo lang gipasanginlan nga mastermind sa scam pero wala siyagiti sa makadaghang higayon sa paborito niyang balikas ug wala hudlata nga putlan og ulo;
Nga igo lang gitawag og brat pero wala pasaligi nga barato rang kinabuhi kay mahimo siyang ipapatay sa kantidad nga P5,000; ug
Samtang nabisto nang bastos nga mga maniobra pag-abuso sa confidential funds, wala pa maablihi ang iyang bank accounts.
- Latest
