Ning kalibotang nagkausab-usab

Walay fixed karong mga panahona. Ang tanan dunay kausaban.  Ang imong kanhi nga higala mahimong imong kaaway. Ang imo kanhing suod mamahimong usa ka tawo nga daw wala nimo hiilhi.

Kini tungod kay walay permanente ning kalibutan gawas sa kausaban.

Bisan gani diha sa natad sa moralidad nahimo naman hinuong relative.

Mahimong ang dili maayo nimo mahimong maayo ug madawat ra alang sa uban.

Kun mahimo kang trending gumikan sa sayop nga binuhatan, dili angayang mabalaka kay basin ang maong binuhatan maghatag kanimo og kahigayonan nga moduso o mo promote og produkto.

Bisan gani ang pulong paghigugma ang mahimong sabton ingon nga kontrata ug dili commitment.Kini tungod kay mahimong disposable ang mindset sa kadaghanan karon.

Kun dili magkauyon mahimong buwagon, kun dili na functional mahimong i-dispose.

Kun mopadayag ka sa imong panahom mahimong ma peligro ang imong posisyon. Ilisan ka dayon kay nahimo ka mang babag sa mga laraw sa kadaghanan.

Sa atong panaw ingon nga “Listening Church” usa man ka dakong hagit ang pag-atubang sa mga kausaban ug kun unsaon man pag cope up sa simbahan niini nga dili malumsan ang iyang identity ning kalibutan nga nagkausab usab.

Sa iyang pagpaminaw unta, dili siya mamahimong mahisama sa kalibutan.

Ug unta sa iyang pagpaminaw dili ang kalibutan maoy magbuot kaniya kondili siya mismo ingon nga inahan ang mogiya sa kalibotan alang sa kaluwasan.