Premyo ni Acosta

Si Gina Acosta gradwado sa kursong Customs Administration. Wala mokuha sa board examination. Bilib si Bise Presidente Sara Duterte sa iyang trabaho sa Davao City Hall nga niadtong 2022 gidala siya ngadto sa Office of the Vice President (OVP) kaulohan.

Wala siya tudloi, wala sab mobasa, ug wala makasabot sa mga probisyon sa 2015 joint memorandum circular sa Commission on Audit ug Department of Budget and Management nga maoy lagda unsaon paggasto ang confidential ug intelligence funds. Pero gitudlo siyang VP Sara isip special disbursing officer sa Davao ug OVP.

Naklaro sa impeachment trial unsay abilidad nga nakahimo niyang mapuslanon: Nituman sa tanang sugo ni VP Sara, apil nang paghatag sa ?500 milyones nga confidential funds ngadto sa dili trabahante sa OVP nga si Koronel Dante Lachica, sa walay pagsusi sa mga balaod nga nalapas.

Dihang gisugo nga mag-Binisaya pagtubag sa mga pangutana sa prosekusyon, namakak nga dili kasabot og Tinagalog ug Iningles (bisan nabisto na sa niaging semana, nisuway na sab gahapon).

Walay mosulti nato unsay gidangatan ni Acosta human napugos sa pag-angkon (salamat sa katakos ni Prosecutor Amando Virgil Ligutan) nga si VP Sara ang nisugo niya paghatag sa kuwarta ngadto ni Lachica. Pero nakabuylo ang depensa paghatag og bag-ong sugo ni Acosta tungod sa pila ka adlaw nga kalangay sa husay.

Nipalusot na si Acosta nga walay gipirmahan nga papel si Lachica pagmatuod nga nakadawat og kuwarta gikan niya. Ug nga wala siya magsusi giunsa paggasto ni Lachica ang kuwarta kay wala nay labot sa sekretong surveillance operations.

Kon makonbikto sa impeachment trial, si VP Sara igo lang matangtang sa pagka bise presidente ug ma-disqualify sa pagdagan pagka presidente sa 2028 (nga maisip nga death penalty sa iyang pamolitika pero dili kapahamtangan og dugang silot bisan multa). Pero silang Acosta ug Lachica gipasidan-an sa prosecutors nga maoy mameligro nga mabalhog sa prisohan tungod sa kasong plunder.

Ambot wala ba molumpayat ang kulba ni Acosta dihang gipahinumdoman ni Ligutan nga siya g’yud ang labing maapiki. Kay samtang walay gipirmahan nga bisan unsang dokumento si Lachica si Acosta ang nipirma sa tanang liquidation documents nga gisumiter ngadto sa Commission on Audit.