BOC at PNP-HPG, nagkagirian sa raid ng smuggled yosi

MANILA, Philippines — Nagkaroon ng tensyon sa pagitan ng mga tauhan ng Bureau of Customs (BOC) at Philippine National Police-Highway Patrol Group (PNP-HPG) matapos i-raid ng huli ang isang compound ng incinerator facility kung saan sinusunog ang mga nakumpiskang smuggled na sigarilyo.

Ayon sa beteranong kolumnista na si Ramon “Mon” Tulfo, dinisarmahan at tinutukan ng mga pulis-HPG ang mga tauhan ng BOC na nakatalaga sa incinerator.

Dahil dito, agad na tumawag si BOC Commissioner Ariel Nepomuceno sa pamunuan ng PNP upang iprotesta ang umano’y pambabastos.

Pinamunuan ni P/Lt. Col. Carlo Carreon Loñosa ang grupo ng HPG-NCR na pilit umanong kinukuha ang mga sigarilyong susunugin na ng BOC. Ipinaliwanag ni Loñosa na nakatanggap sila ng report hinggil sa smuggled na sigarilyo ngunit nagkamali sila ng lugar na ni-raid.

“Anong kinalaman sa smuggling ang PNP-HPG? Kahit na legit ang kanilang pangri-raid, HPG-NCR was operating out of its jurisdiction,” ani Tulfo sa kanyang Facebook post.

Hinimok din niya si Nepomuceno na isumbong ang mga sangkot na pulis sa National Police Commission (Napolcom).

Samantala, nitong Agosto 22 ay ipinost ni Tulfo ang administrative relief orders hinggil sa pagsibak sa 13 opisyal at miyembro ng Regional Highway Patrol Unit-NCR (RHPU-NCR), kabilang ang hepe na si Police Co­lonel Joey Tomas Caise.

Si Caise ay inilipat sa Human Resource Ma­nagement and Doctrine Development Division (HRMDD), kasama sina PLtCol Carlo Carreon Loñosa, PMaj Romar Amparo Exile, PSMS Dennis Attaban Ancheta, PSMS Jake Cleopas Balberde, PSMS Bryan Nicol Castillo, PCpl Melvin Da-Ut Habbiling, PCpl Edrick Prologo Semilla, PCpl Reneboy Puno Sumbilon, Pat. Gabriel Darole Capellan, Pat. Jefrey Buela Carilo, Pat. Bill Anthony Birao Estrada, at Pat. Andrew Bernardino Marzan.