EDITORYAL - Bakit hindi na prayoridad ang CADENA Act?
Walong buwan. Iyan ang bilang ng buwan na lumipas mula nang aprubahan ng Senado ang Senate Bill 1506 o ang Citizen Access and Disclosure of Expenditures for National Accountability (CADENA) Act noong Disyembre 15, 2025.
Walong buwan na ring nakatambak lamang ito sa House of Representatives, habang tayo, ang bayan, ang patuloy na naghihintay.
Ginawa ang panukalang ito bilang tugon sa mga kontrobersiya at anomalya sa mga pampublikong pondo, lalo na sa mga proyektong pang-imprastraktura at flood control.
Layunin ng CADENA Act na gamitin ang blockchain technology upang ilagay sa iisang pampublikong online portal ang lahat ng dokumento kabilang dito ang mga kontrata, listahan ng proyekto at gastusin
Pero habang tayo’y binabaha nang paulit-ulit, ang batas na dapat sanang tumulong para malaman natin kung saan talaga napunta ang pera para sa flood control ay nakatengga lang sa isang komite.
Mula sa pagiging ikatlo sa listahan ng priority bills ng LEDAC bumagsak ito sa ika-41 puwesto. Ano ang nangyari?
Bakit hindi na ito umuusad?
Bakit walang paggalaw sa loob nang maraming buwan?
Balak pa ba itong ipasa o hindi na?
Bakit biglang bumaba ang pagiging priority ng isang batas na dapat sana’y hindi na kailangan pang pagtalunan dahil 17-0 ang boto nito sa Senado?
Hindi ito usapin ng teknikalidad. Ito ay usapin ng pagpili, pagpili ng Kongreso na patagalin pa ang isang batas na dapat matagal nang ipinatutupad, sa mismong panahon na pinakakailangan natin ito.
Bawat buwang naka-freeze ang CADENA Act ay isa pang buwang maaaring lusutan ng katiwalian, isa pang proyektong hindi pa rin masusubaybayan, isa pang barangay na babahain nang hindi alam kung saan talaga napunta ang pondong dapat sana’y nagligtas sa kanila.
Hindi dapat hintayin pa ng Kongreso ang susunod na baha, bago sila kumilos. Ilabas na sa komite ang CADENA Act.
Ipasa na ito, bago pa tuluyang lumubog sa limot, tulad ng mga proyektong hindi rin nalaman kung saan napunta. Bakit kung alin ang dapat iprayoridad na batas ito naman ang kinalilimutan ng mga mambabatas.
- Latest
