EDITORTYAL - Ngano gyud kaha?

Naukay nasad ang nasud sa lain napung dugoong hitabo sulod sa usa ka eskuylahan nga naglambigit sa mga estudyante kagahapon, ning tungora, sa usa ka pribadong eskuylahan nga Ateneo de Zamboanga University .

Duha ka estudyante ang namatay, apil ani ang estudyanteng gunman nga gikatahong nigamit og 9mm Glock pistol ug M16 Assault rifle nga gikataho sab nga service firearm sa amahan niini nga hepe sa Enforcement and Security Service sa Bureau of Customs sa Port of Zamboanga.

Sa nangaging mga susamang insidente, sama sa nahitabo sa Tacloban City niadtong bulan sa Hunyo, kadtong nahitabo sa mga eskuylahan sa Luzon ug uban pang mga pagpanghulga sa mga eskuylahan dinhi sa Sugbu, init kaayo kining gihisgutan sa mga otoridad apil na ang Department of Education.

Halos tanang local government units ug mga lokal nga kapolisan naghimo og mga lakang para maprotektahan ang mga estudyante sa ilang mga tunghaan, publiko man o pribado. Klase-klaseng pamaagi ang gibuhat para pahugtan ang ilang mga seguridad.

Apan sa gihapon, naa gihapoy mga susama ani nga mga makalusot ug nakadala gyud og armas. Daghan ang mga nangutana kun giunsa man pagpalusot aning estudyante ang mga armas diha sa ilang ganghaan kung hugot gyud ang seguridad nga gipatuman?

Dunay lain-laing mga rason nganong gibuhat kini sa mga bata, naay niingon nga nabiktima daw sila og bullying ug uban pang pagpangabusar kanila sa ilaha rang mga classmates o nauwawan sa gibuhat sa ilang mga magtutudlo.

Pero, angay pud tingaling tutokan ang mga report bahin anang impluwensiya sa mga bayolenteng online games sa panghunahuna sa mga batang nagbuhat aning maong mga krimen ngadto sa ilang mga kaparehas nga estudyante.

Wala ba kaha gihimo nalang sayun nga rason sa pagbuhat sa krimen kaning bullying ug pagmaltrato sa ilaha , pero ang tinuod gisuon-suon lang nila ang mga gibuhat diha sa mga online games nga wala magtan-aw sa epekto niini sa tinuod nga kinabuhi?

Bisan gani ang mga hulga gipaagi lang sa social media, nakaapektar gyud sa regular nga mga klase sa mga bata kay nanagana gyud pud ang mga school officials para sa kaluwasan sa ilang mga estudyante ug mga magtutudlo.