Mga atraso ni Dizon
Nagkataas ang listahan sa mga atraso ni Department of Public Works and Highways (DPWH) Secretary Vince Dizon sa mga Sugboanon:
1. Gi-lifestyle check ni Dizon silang DPWH Central Visayas Regional Director Danilo Villa ug Right-of-Way and Legal Division (ROWALD) Chief Brando Raya, nga gipadad-an og show cause orders sa Septiyembre sa niaging tuig tungod sa pasangil sa lavish lifestyle ug koneksiyon sa substandard o ghost projects, pero hangtod karon wala mopahibawo si Dizon unsay resulta sa imbestigasyon;
2. Gitangtang ni Dizon si Villa pero walay pahibawo gipasakaan ba og kaso ug wala matandog si Raya (gikatahong nanabi silang Villa ug Raya nga gipasaligan ni Dizon og mas taas nga mga puwesto);
* * *
1. Nisaad si Dizon niadtong Disyembre nga ikiha nang mga politiko, DPWH officials ug mga kontraktor nga responsable sa sayop nga flood control projects sa Sugbo niadtong Enero pero wala pay bisan usa nga nakiha hangtod karon (National Bureau of Investigation, dili DPWH, ang nirekomendar og mga kaso sa 20 ka opisyal sa DPWH ug pribadong mga indibiduwal tungod sa duha ka gidudahang ghost projects sa Singsing, Balamban);
2. Gibasol ni Dizon ang posibleng konsabo sa mga politiko, DPWH officials ug mga kontraktor sa Sugbo sa pagsupak sa drainage master plan sa Japan International Cooperation Agency (JICA) nga magtukod og dams sa ibabaw sa mga sapa (nagpatuyang hinuon og tukod og dikes ubos sa mga sapa nga wala kapugong ug gibanlas hinuon sa mga baha) sa walay paghingalan kinsay angayng paninglan ug kasohan;
* * *
1. Nipasalig si Dizon ni Presidente Ferdinand Marcos Jr. atol sa paghawan sa Mahiga Creek sa Nobyembre sa niaging tuig, nga maoy gibasehan ni Marcos sa pagpasigarbo sa mga Sugbuanon, nga wala nay baha sa Sugbo karong tuiga pero padayong gibahaan ang Metro Cebu bisan walay bagyo pipila ka semana ang nilabay (wala magtagad silang Dizon ug Marcos sa pagpasabot, ni pagpangayo og pasaylo, sa sayop nilang pahibawo); ug
* * *
2. Nipasalig na sab si Dizon atol sa iyang pagbalik sa Sugbo niadtong Martes nga inanay nang masulbad ang problema sa baha sa Sugbo sa dili pa matapos karong tuiga (sa walay paghatag og sukaranan nganong ato pa siyang tuohan human sa nagkadaghan nang mga pamakak).
* * *
- Latest
