AFP Chief Nafarrete, Romero, 35 pa lusot sa CA

MANILA, Philippines — Pinagtibay ng Commission on Appointments (CA) ang ad interim appointment at promosyon nina Armed Forces of the Philippines (AFP) Chief of Staff Gen. Antonio G. Nafarrete, PAF Reserve Brig. Gen. Michael Odylon L. “Mikee” Romero, at 35 pang senior at flag officers ng militar.

Si Nafarrete, na nanungkulan noong Hulyo 21 bilang kapalit ni Gen. Romeo S. Brawner Jr., ay naging ika-61 Chief of Staff ng AFP na may ranggong four-star. Nakumpirma rin ang ranggong three-star ni Air Force Lt. Gen. Thad Rufino P. Candelario.

Kabilang si Romero, dating Deputy Speaker at 1-PACMAN party-list representative, sa mga nakatanggap ng kumpirmasyon bilang Brigadier General sa PAF Reserve kasama ng 19 iba pa. Kilala siya bilang pangunahing tagapagtaguyod ng reservist movement at pinuno ng Association of Reservists and Reservist Administrators of the Philippines, Inc. (ARRAPI).

Kasama ring nakumpirma sina Col. Vladimir Mata ng Marine Corps at Col. Floreto Solano ng PAP—mga lider ng ARRAPI—na binigyang-diin ang papel ng reservists sa national defense, disaster response at humanitarian assistance.

Bilang mambabatas, isinulong ni Romero ang AFP modernization at pondo para sa tatlong brand new C-130J Super Hercules transport aircraft ng Philippine Air Force na nakatakdang dumating ngayong taon. Ang kanyang promosyon ay nakikitang mahalagang yugto na nag-uugnay sa kanyang legislative advocacy at pamumuno sa pagpapalakas ng reserve force.

Kinumpirma rin ng CA ang walong opisyal sa ranggong Colonel o Captain sa Philippine Navy na kumumpleto sa 37 senior AFP at flag officers na nakatanggap ng kumpirmasyon.