Dili na Sara Court?
Kadako sa kausaban sa Korte Suprema:
Sa niaging tuig, ang tanang 15 ka mahistrado nidupa ni Bise Presidente Sara Duterte gikan sa orihinal nga articles of impeachment nga gipasaka sa House of Representatives batok niya; pero
Wala na mopugong sa bag-ong impeachment proceedings sa House karong tuiga nga maoy awhag ni VP Sara ug mga dumadapig pinaagi sa lab-as nga petisyon; nga
Gibasura karong semanaha, upat ka buwan human napasaka, uban ang pasabot nga uwahi nang tanan, kay na-transmit nang bag-ong articles of impeachment ug nakabuylo nang Senate impeachment trial.
* * *
Nitakdo ba sa 1987 Constitution ang mga lakang sa House ug Senado maong wala kakita og rason ang Korte Suprema sa pagbaraw sa proseso? O nitagam ang mga mahistrado sa kusganong mga pagsaway nga nahiagoman gikan sa nagpakabana nga mga sektor sa ilang pagpanghilabot sa niaging tuig?
O nakahukom ba ang 12 ka mga tinudlo ni kanhi Presidente Rodrigo Duterte (apil si Chief Justice Alexander Gesmundo) nga nakabayad na sa ilang utang kabubut-on sa pagpabor ni VP Sara ug busa gawasnon nang mohimo og sukwahi nga desisyon karong tuiga?
* * *
O ambisyoso lang ang mayoriya nila? Kay mo-retiro na man si Gesmundo karong Nobyembre, nakamatngon sa dakong kahigayonan nga matuman ang ilang damgo nga makahupot sa labing taas nga puwesto sa labawng hukmanan.
Posibleng nakahunahuna nga dili makadaot sa ilang promosyon ang dili paghimo og mga desisyon batok sa Malakanyang. Sama sa pagbabag sa hiningusgang kampanya sa administrasyon pagpalagpot ni VP Sara sa puwesto ug pag-disqualify niya sa eleksiyon sa 2028.
* * *
O nakahunahuna ang mayoriya sa mga mahistrado, ug hinaot nga mao kini ang tinuod nga rason, nga dili maayo ang luna nga ilang okupahan sa kasaysayan kon padayong magpagamit sa nagkabangga nga mga puwersa sa politika. Ug determinado nang mopatigbabaw sa balaod bisan kinsay hingtungdan. Aron nga ikapasigarbo ang ilang kaligdong sa umaabot nga henerasyon.
O tingali kumbinasyon sa tanang nalista sa ibabaw. O tingali lisod ang paghapsay sa nagkasungi nilang mga interes. Maong gipatigbabaw ang petisyon ni VP Sara sa niaging tuig tungod sa technicality. Ug gibasura ang petisyon ni VP Sara karong tuiga tungod sa, nakatag-an ka, laing technicality.
* * *
- Latest
