OVP budget dili magamit
Human balibari sa Senado ang hangyo ni Bise Presidente Sara Duterte nga bayran ang ilang caterer nga moandam ug mosilbi og mga pagkaon ug mainom sa iyang defense lawyers ug support staff sa nagpadayong impeachment trial, nitumaw ang mosunod nga mga pangutana:
Magamit ba ang pundo sa OVP sa pagbayad sa caterer nga moserbisyo sa defense team?; ug
Mahimo bang i-destino ang mga opisyal ug mga trabahante sa OVP aron motubag sa mga panginahanglan sa defense lawyers, sama sa paghan-ay ug pagprinta sa mga dokumento sa impeachment trial?
* * *
Retiradong Sugboanong opisyal sa Commission on Audit (COA) nga nihangyo nga dili magpaila niuna pagtubag sa wala ipangutana. Magamit bang pundo sa OVP pagbayad sa defense lawyers ni VP Sara:
Dili. Kay gidid-an si VP Sara sa mga lagda sa COA pagkontrata ug pagbayad og pribadong mga abogado. Gawas lang kon tugotan siya sa Office of the Solicitor General. Pero katugotan lang kon ang kaso naglambigit sa OVP. Walay labot ang OVP sa impeachment trial. Ang gasto sa depensa ni VP Sara kinahanglang kuhaon gikan sa iyang pribadong bolsa.
* * *
Mahimo bang abagahon sa OVP ang bayad sa caterer nga eksklusibong mo-atiman sa defense lawyers ug support staff?
Dili. Kay ang pundo sa OVP magamit lang sa pagpatuman sa mga programa ug mga proyekto para sa publiko. Ang pagtubag sa articles of impeachment batok niya personal nga obligasyon ni VP Sara. Gikontrata niyang 16 ka defense lawyers sa iyang personal nga kapasidad. Dili magamit ang pundo sa OVP para sa pribadong katuyoan.
* * *
Mahimo bang ipadala ni VP Sara ang sinaligan niyang mga opisyal ug mga trabahante sa OVP ngadto sa Senado aron maka-atiman sa mga panginahanglan sa defense lawyers?
Dili. Kay ang mga opisyal ug mga trabahante sa OVP gisuweldohan sa mga magbubuhis aron moserbisyo sa publiko. Dili mahulbot gikan sa ilang mga trabaho sa OVP aron motabang pribadong gimbuhaton ni VP Sara sa pagpanalipod sa iyang kaugalingon. Dili magamit ang pundo sa gobyerno para sa dili publiko nga katuyoan. Sa laktod nga pagkasulti: Gipasanginlan si VP Sara nga nangawat sa buhis sa katawhan; dili makiangayon nga ang katawhan maoy pagastuhon sa iyang depensa.
* * *
- Latest
