Makatintal gyud sa mga huyang

Makatintal gyud ang offer nga mag-endorso og online games—nga kon atong pasayonon sa pagsulti, online sugal gyud. Gani, sa ako mismong platform, bisan og gamay pa ang akong mga followers, daghan na kaayo ang mag-sige og email nga nagtanyag niini nga endorsement. Naa pay mo-offer daan og dako kaayong kantidad. Makahunahuna ka kadyot sa pagdawat kay instant money man gud; dili ka panington, naa na kay kwarta. Apan akong gibalibaran. Ngano?

Tungod kay daghan ang maapektohan. Una, konektado pa ko sa kompaniya nga akong gialagaran, ug kon mosulod ko niini, segurado nga dili nila i-tolerate ang sugal. Labaw sa tanan, dili makaya sa akong konsensya nga makakita og mga tawo nga maguba ang kinabuhi tungod lang kay nabuang sa sugal.

Dili nako hukman ang uban nga nag-engage niini kay duna man pud sila’y panginahanglanon alang sa pamilya nga gibuhi. Labing maayo na lang kini kay sa manulis o mangawat. Iya-iya lang gyud ta og diskarte sa kinabuhi.

Apan ang dili nako matugkad mao kining mga influencers nga datu na kaayo, apan nikagat pa gyud sa tinagingting sa kwarta! Ilang gi-engganyo ang mga tawo bugti sa mga mahalon nga cellphone nga trending kaayo sa social media. Bisan gani ang ubang mga politiko, nakitrending na lang sad alang sa engagement.

Kini nga influencer, naa nay 50 ka milyon ka followers sa Facebook pa lang. Ingon ana siya ka gamhanan sa pagdani sa mga tawo nga nangindahay nga makadawat og mahalon nga gadgets. Makahinuktok ka: pila kaha ka kinabuhi ang moasenso sa sugal, ug pila kaha ang malubong sa kalisdanan tungod sa pagka-gum-on sa online sugal?

Hinuon, depende na usab sa tawo kon mosugal sila. Sa panahon karon, naa na sa atong mga palad mismo ang casino—mo-pop up lang gihapon bisan og walay endorsement. Kon mosugal ang tawo, wala gyuy makapugong.

Sa mga datu nga influencers: Kamo nga mga milyonaryo na ug sikat na kaayo sa social media, dili ba gyud paigo ang inyong kwarta?

Angay ninyong hinuktokan kon pila ka kinabuhi sa inyong mga kabus nga followers ang malunod sa utang tungod sa inyong pag-promote og sugal baylo lang sa dugang minilyon ug mahalon nga gadgets. Giuna ninyo ang inyong bulsa kay sa kaayohan sa mga tawo nga nagpahimutang kaninyo sa kahitas-an!

Sa mga politiko: Apil sab kamo nga mga opisyal sa kagamhanan nga nakisakay sa tren sa online sugal alang lang sa "likes" ug "engagement." Imbes nga kamo ang manguna sa pagpanalipod sa moralidad ug kaayohan sa inyong lungsod, kamo man hinuon ang nahimong tigtulod sa mga tawo ngadto sa bisyo. Ayaw isakripisyo ang inyong prinsipyo alang lang sa dungog sa social media!

Kumusta na man ang inyong gipanghambog nga crackdown batok sa mga influencers nga nag-promote og online gambling? Gana-gana lang? Selective ra? Nganong ang mga "gagmay nga isda" ra man ang daling mapangdakpan ug mapasakaan og kaso, samtang ang mga dagkong influencers ug mga naay kapit sa gahom gipasagdan man ug gipiyungan lang?

 Kon seryoso mo sa paggukod niini, magmadasigon ug mag-consistent unta mo, dili kay kon kinsa ray natimingan!