Tulo ka piskal sa Mandaue gikasohan ni Garcia

CEBU, Philippines — Ang kanhi consultant sa Cebu Provincial Detention and Rehabilitation Center (CPDRC), Byron Garcia nipasaka og kriminal ug administratibong reklamo ngadtp sa Office of the Ombudsman-Visayas batok sa tulo ka piskal sa Office of the City Prosecutor sa Dakbayan sa Mandaue tungod sa giingong paglapas sa Anti-Graft and Corrupt Practices Act ug uban pa’ng administratibong kalapasan.

Sa iyang reklamo nga gipetsahan og Hulyo 22, 2026 nga gipadala ngadto kang Deputy Ombudsman for the Visayas Dante Vargas gihangyo ni Garcia nga pasakaan og unom ka kaso matag usa ang nahisgutang mga piskal tungod sa giingong paglapas nila sa Section 3(e) sa Akta Republika 3019 kun “Anti-Graft and Corrupt Practices Act”.

Ang maong mga piskal gilangkuban nila ni Associate Prosecutor Mariven Calamba, Deputy City Prosecutor Sarah Vanessa Lacno-Tudtud ug City Prosecutor Mary Francis Daquipil. Gipasakaan usab niya ang tulo ka piskal og administratibong reklamo tungod sa giingong Grave Misconduct, Gross Neglect of Duty, Abuse of Authority, Gross Incompetence, Gross Negligence, Conduct Unbecoming of a Public Official ug Conduct Prejudicial to the Best Interest of the Service.

Gihangyo ni Garcia ang Ombudsman nga susihon kong adunay probable cause alang sa mga kasong kriminal ug substantial evidence alang sa mga administratibong kaso.

Sa iyang complaint-affidavit, gipadayag ni Garcia nga adunay seryosong kapakyasan sa pamaagi ang mga piskal sa pagdumala sa unom ka reklamong kriminal nga gisang-at batok kaniya ni Elisse Nicole Catalan nga iyang giila nga anak ni Cebu Governor Pamela Baricuatro.

Matud ni Garcia nga ang Office of the City Prosecutor sa Dakbayan sa Mandaue nipasaka og tulo ka impormasyon alang sa Online Gender-Based Sexual Harassment sa Municipal Trial Court in Cities (MTCC) sa Mandaue ug tulo ka impormasyon alang sa Cyber Libel sa Regional Trial Court bisan og wala siya hatagi og higayon sa pagsumite sa iyang counter-affidavits.

Si Garcia nangangkon nga wala siya makadawat og subpoena ug nahibalo siya sa mga kasong Online Gender-Based Sexual Harassment human siya gidakop samtang nahibalo siya sa mga kasong cyber libel pinaagi sa iyang kaugalingong paningkamot.

Ug bisan og nagpakita sa record nga giingong gipadala pinaagi sa registered mail ang mga subpoena ngadto sa iyang pinuy-anan kini nahibalik ug adunay notasyon nga “no one to receive.” Gitumbok ni Garcia nga siya ug ang iyang pamilya nagpuyo gihapon sa maong address ug adunay mga hamtong nga sakop sa panimalay nga kanunay’ng anaa sa balay ug makahimo unta sa pagdawat sa bisan unsang opisyal nga pahibalo.

Gitumbok usab niya ang usa ka sertipikasyon gikan sa Corona del Mar Homeowners Association nga nag-ingon nga walay personnel sa Philippine Postal Corporation nga nisulod sa subdivision niadtong Pebrero 19, 2026, ang petsa nga giingong nisulay sa paghatod sa subpoena apan walay record sa security logbook sa subdivision nga adunay postal employee nga nisulod niadtong adlawa.

Gibasehan usab sa reklamo ang usa ka order nga gipagawas sa Branch 83 sa Regional Trial Court sa Dakbayan sa Mandaue nga nagtugot sa iyang motion for leave to conduct a reinvestigation.

Si Garcia nagkanayon nga nakit-an sa korte nga kulang ang suporta sa giingong pagsulay sa paghatud sa subpoena ilabina kay walay detalye sama sa identity ug pirma sa postman nga giingong nitugyan niini. — (BANAT NEWS)