Binaliw landfill naa sa kritikal nga kondisyon
CEBU, Philippines — Giila sa Environmental Management Bureau (EMB) ang lima ka sanitary landfill sa nasud nga anaa sa "critical condition" ug delikado nga masunog. Apil sa giila ang Binaliw Sanitary Landfill sa Dakbayan sa Sugbo kun diin nidahili ang basura niadtong Enero 8, 2026 ug mikalas og 36 ka trabahante ug usa ka volunteer rescuer.
Kini ang gibutyag ni EMB Director Michael Matias atol sa pagbukas sa imbestigasyon bahin sa mga kapakyasan sa pagdumala sa basura human gipadayag ni Senador Risa Hontiveros ang panginahanglan og dinaliang aksyon aron malikayan ang dugang trahedya.
Gawas sa Binaliw, lakip sa kritikal nga mga landfill mao ang Navotas Sanitary Landfill, Rizal Provincial Sanitary Landfill sa Rodriguez, Rizal, Davao City Sanitary Landfill ug Urdaneta Sanitary Landfill sa Pangasinan.
Si DENR EMB-7 Director Atty. John Edward Ang miingon nga natural ang hinungdan sa pagdahili sama sa linog ug baha apan ni-insister si Hontiveros nga nakatampo sab gyud sa trahedya ang operasyon sa landfill.
Gikutlo ni Hontiveros ang 2023 Commission on Audit (COA) report nga nagpasidaan na kaniadto pa nga ang Binaliw anaa na sa "critical condition" tungod sa hilabihang kadaghan sa nagpundok nga basura ug kakuwang sa mga pasilidad alang sa pag-recycle o pag-divert sa mga basura.
Samtang gipadayag usab ni Cebu City Mayor Nestor Archival nga moabot ngadto sa 600–700 ka tonelada nga basura ang makolekta matag adlaw. Ang siyudad naggasto og hapit ?1 bilyon matag tuig alang sa paghakot niini.
Nanawagan usab ang mga grupo sama sa Greenpeace ug Mother Earth Foundation alang sa pagpatuman sa Republic Act 9003 o ang Ecological Solid Waste Management Act diin ang landfill kinahanglan nga katapusan na lang nga opsyon sa paglabay og basura. (BANAT NEWS)
- Latest
