Kapuyo gipatay tungod sa selos

CEBU, Philippines — Nadakpan na sa kapulisan ang 40-anyos nga lalaki nga gipasanginlang mipatay sa iyang live-in partner ug miangol sa amahan sa biktima sa nahitabong pagpanunggab sa Sitio Dap-Dap, Barangay Dumlog, Toledo City.

Base sa imbestigasyon, nahitabo ang insidente alas-9:00 sa gabii niadtong Hulyo 4, diin giingong misulod ang suspek nga si Cyril Cabaluna 40 anyos sa balay diha agi sa kusina.

Samtang nag-andam og panihapon ang iyang live-in partner nga si An-an Traya Mañacap, 33 anyos, kalit siyang gisulong ug gidunggab sa suspek gamit ang gunting.

Naigo ang biktima sa agtang, nawong, ug liog. Misulay og tabang ang stepfather sa biktima nga si Pedro Madrid Rizal, 63, pinaagi sa paghapak sa suspek gamit ang puthaw.

Apan nailog sa suspek ang maong puthaw ug maoy gihapak usab ngadto sa tigulang nga maoy hinungdan sa iyang mga samad.

Gidala dayon si Mañacap sa Toledo City Hospital apan gideklarar siyang patay sa attending physician. Samtang si Rizal luwas sa maong pag-atake. Matud sa kapulisan, gituohang grabeng pangabubho o selos ngadto sa mag-live-in partner ang motibo sa suspek.

Human sa insidente, milayas ang suspek apan nasikop siya alas-7:20 sa buntag niadtong Hulyo 5 sa Barangay Cambang-ug, Toledo City pinaagi sa hot pursuit operation sa Toledo City Police Station kinsa positibong giila sa ama-ama sa namatay nga si Rizal. Ang suspek karon anaa na sa kustodiya sa Toledo City Police Station ug giandam na ang kasong murder ug physical injury batok kaniya. — /IBM (BANAT NEWS)