Wanted nga South Korean nadakpan

CEBU, Philippines — Nadakpan sa hiniusang manhunt operation sa mga otoridad ang usa ka South Korean national nga gipangita sa Interpol ubos sa Red Notice niadtong Huwebes sa hapon, Hulyo 2, sa Barangay Marigondon, Lapu-Lapu City.

Ang nadakpan mao si Nam Hyeongseok, 27, nga gipangita sa mga otoridad sa South Korea tungod sa kasong Organization of Criminal Groups ubos sa Article 114 sa Criminal Act sa maong nasud.

Giingong nalambigit siya sa usa ka voice phishing syndicate nga didto sa Cambodia pinaagi sa pekeng stock investment ug online shopping scams. Gawas pa niini, ikanapulo na sab siya nakombikto didto sa South Korea tungod sa insurance fraud ug pagdagmal.

Ang operasyon gipahigayon sa hiniusang pwersa sa Bureau of Immigration Fugitive Search Unit, CIDG Regional Field Unit 7, Regional Intelligence Division 7, Lapu-Lapu City Police Office, ug Korean National Police.

Gikustodiya na siya sa BI para i- deport balik sa South Korea.—  IBM BANAT NEWS