Walay ghost projects sa Balamban – PJ

CEBU, Philippines — Gihimakak ni kanhi kongresista sa 3rd district sa Sugbo Pablo John "PJ" Garcia ang alegasyon batok kaniya nga adunay "ghost projects" sa duha ka flood control projects diha sa Lungsod sa Balamban.

Matud ni Garcia nga tinuod ug nahuman ang maong mga proyekto ug gigamit na kini sa katawhan ilabina sa panahon sa pagbaha ug una niyang gihatagan og higayon ang Department of Public Works and Highways (DPWH) sa pagpatin-aw sa kontrobersiya.

Apan tungod kay wala pa matubag ang mga pangutana kabahin sa isyu nakahukom siya’ng ipahibalo sa publiko ang iyang nahibaw-an.

Gikompirma ni Garcia nga nahuman na ang duha ka proyekto, giturnover sa lokal nga kagamhanan, gidawat sa mga benepisyaryo’ng LGU ug na-audit na usab sa Commission on Audit (COA).

Nasulayan na usab ang mga flood mitigation structure atol sa pagbaha gumikan sa bagyong Tino ug nagpabilin kining nagbarog.

Si Garcia nagkanayon nga ang tinuod nga gilalisan dili ang paglungtad sa proyekto apan ang hustong nahimutangan niini.

Matud usab ni Garcia nga base sa geo-tagging application nga gigamit sa gobiyerno gipakita sa DPWH nga nahimutang ang mga proyekto sa Barangay Singsing nga mao usab ang nahisgotan sa General Appropriations Act (GAA).

Apan nagtuo ang National Bureau of Investigation (NBI) nga ang mga proyekto nilapas og pipila ka metros ngadto sa Barangay Cantuod nga silingang barangay subay sa samang suba.

Ug tungod niini, iyang gisugyot ang paghimo og joint re-inspection nga tambongan sa NBI, DPWH ug COA uban sa mga sakop sa media, civil society groups ug ubang interesado nga mga sektor aron makita mismo ang kahimtang sa mga proyekto.

Gihangyo usab ni Garcia ang publiko nga mag-amping sa paggamit sa pulong nga "ghost project," diin matud niya nga dako kini og epekto dili lang sa mga politiko apan  ilabina sa mga career civil servants nga mahimong maapektohan sa mga akusasyon.

Niadtong Hulyo 1, 2026 gipahibalo sa NBI nga ilang girekomendar ang pagsang-at og kasong kriminal batok sa duha ka contractor ug pipila ka opisyal sa DPWH tungod sa giingong duha ka "ghost flood control projects" sa Barangay Singsing, Lungsod sa Balamban.

Matud sa NBI nga nasuta sa ilang imbestigasyon nga ang coordinates nga anaa sa usa sa mga kontrata dili motakdo sa nahimutangan sa usa ka flood control structure samtang giingon usab sa DPWH nga ang usa sa mga proyekto gibalhin ngadto sa laing barangay, usa ka isyu nga posibleng mahimong bahin sa paghusay sa kaso. BDB BANAT NEWS