Dul-an ?1B sigarilyo nasakmit

CEBU, Philippines — Nasakmit  sa hiniusang operasyon sa mga law enforcement agencies ang 25 ka 20-foot shipping container vans nga adunay gibanabanang sulod nga dul-an sa P900 milyones nga balor nga ilegal nga sigarilyo diha sa sulod sa Gothong Wharf sa Barangay Subangdaku, Mandaue City.

Ang operasyon gipahigayon alas-6 sa gabii niadtong Hulyo 2, 2026, sa National Bureau of Investigation–Cebu District Office (NBI-CEBDO), NBI-CEVRO, Bureau of Customs (BOC) Intelligence Group, Bureau of Internal Revenue (BIR), Philippine Coast Guard District Central Visayas (PCG), Philippine National Police Maritime Group, CIDG Mandaue Field Office, National Intelligence and Security Group (NISG), ug uban pang mga ahensya sa gobyerno.

Ang maong operasyon kabahin sa direktiba ni Presidente Ferdinand Marcos Jr. nga pangusgan ang kampanya batok sa smuggling.

Niadtong Hunyo 24, naa say nasakmit nga 11 ka 40-foot containers nga adunay susamang kargamento dinhi gihapon sa Cebu. Apan usa ka adlaw sa wala pa to, naa say nadakpan 24 ka container vans sa smuggled nga sigarilyo gikan sa Cebu nga nasakmit didto sa Tondo, Manila.

Sumala sa NBI, human makadawat og bag-ong impormasyon nga naa pay mga containers sa sulod sa maong pantalan, nakig-koordinar sila sa Gothong Shipping Lines ug nagpahigayon og document verification, intelligence gathering, ug surveillance operation.

Human nakompirmar ug natultolan ang mga containers ila  kining gi-padlock, gimarkahan, ug gipabantayan.

Niadtong Hulyo 2, giinspeksyon sa NBI ug Bureau of Customs ubos sa Letter of Authority ni BOC Commissioner Ariel F. Nepomuceno ang mga container vans.

Nasuta nga puno ni og imported nga sigarilyo nga illegal nga gipasulod sa nasud.

Unom ka mga shippers ang nailhan na sa NBI ang giingong nalambigit sa pagpasulod sa maong mga kontrabando.

Naglakip ni sa usa ka surplus nga negosyo, agrivet supplies, hardware ug construction, home equipment, marine products  ug cargo handling services.

Kasong  paglapas sa Customs Modernization and Tariff Act, National Internal Revenue Code, Anti-Agricultural Economic Sabotage Act, ug uban pang kaso ang ipasaka batok kanila.

Gipasalig sa NBI nga magpadayon ang koordinasyon nila sa BOC ug uban pang law enforcement agencies aron batokan ang smuggling sa nasud. IBM BANAT NEWS